1 Yohanes 2

12 Ngoi to lefo surata nena-ne ra ngini ga’a ninga ngo-ngaku ma tero sa’olo ngowa 'olo-ngowa 'olo,

sababu Ma Jou’ongu Madutu 'a singi-ngiranga ḏua ninga ḏosa-ḏosa sababu Kristus 'a si’a’a ḏua di’a ngini.

13 Ngoi to lefo surata nena-ne ra ngini ga’a ninga ngo-ngaku ma tero sa’olo ḇaḇa-ḇaḇa,

sababu ngini reni nana’o Unanga ga’a 'ua re 'au wali moju, rema enanga ḏua wakutu dungia 'i sidadi nyangu.

Ngoi to lefo surata nena-ne ra ngini ga’a ninga ngo-ngaku ma tero sa’olo ngowa-ngowa’a tubaie,

sababu ninga ngo-ngaku kama elala ua toma 'Iblisi ma bo-baja.

14 Ngoi to lefo surata nena-ne ra ngini ga’a ninga ngo-ngaku ma tero sa’olo ngowa 'olo-ngowa 'olo, sababu ngini ni nana’o Ma Jou’ongu Madutu ḏua sa’olo ninga Ḇaḇa.

Ngoi to lefo surata nena-ne ra ngini ga’a ninga ngo-ngaku ma tero sa’olo ḇaḇa-ḇaḇa,

sababu ngini reni nana’o Unanga ga’a 'ua re 'au wali moju, rema enanga ḏua wakutu dungia 'i sidadi nyangu.

Ngoi to lefo surata nena-ne ra ngini ga’a ninga ngo-ngaku ma tero sa’olo ngowa-ngowa’a tubaie,

sababu ngini ngowa’a te-te’e taninga ngo-ngaku,

re ninga de’oso re ḏegoro 'i mete’e Ma Jou’ongu Madutu 'ai do-doto’o re ninga ngo-ngaku kama elala ua toma 'Iblisi ma bo-baja.

15 Awa ngini ni dadalara dungia bolo 'oru ḇato toma dungia ma dara.*2:15 Gena-ge ma ngale: Awa ngini nyafusu ni dadi ma tero sa’olo ngowa-ngowa’a ga’a 'ahu di’a dungia bolo ni nyafusu 'oru ḇato ananga gena-ge 'aḏi nyafusu. Sababu na’o 'a guna ḇato 'o dadalara dungia, unanga 'o dadalara ua 'ai Ḇaḇa Ma Jou’ongu Madutu.✝2:15 Yak. 4:4