1 Pedro 3

Were’a re nau’u

1 So’o gena ḏi’i ngini were’a-were’a: Ngini balasu ni ta’aloko taninga nau’u. Dadi na’o ninga nau’u 'aḏi ngaku nyangu Ma Jou’ongu Madutu 'ai demo, kalaha ngini ni sihabari ua ra ananga, ananga nyengara 'aḏi ngaku Habari Roanga mangale Kristus,✝3:1 Ef. 5:22; Kol. 3:18 2 sababu ananga ya oḏi’i ngini ninga de’oso re ḏegoro 'ofi-'ofi, re ngini ni sita’aloko ananga. 3 Awa pa’i ni sijumu ninga jamani reni tuhu ninga utu ma rousu bolo ni pake guraci bolo pakeanga ma ijana hali-hali. Gena-ge ngowa’a ya oḏi’i pa’i toma ḏuḏunu.✝3:3 1Tim. 2:9 4 Mada’a ngini balasu ni sijumu ninga jamani mode-mode’e taninga nau’u reni sidodai ninga 'akala re sinyingara mereoso re kama 'oro mangale ua ga’a 'i baolo taninga 'akala re sinyingara ma dara. Jamani gena-ge kasingado-ngadolo i’a, re lai hali madutu ra Ma Jou’ongu Madutu 'ai momina. 5 De’oso re ḏegoro so’o gena-ge we-were’a ma siḏa moju ya si’a’a ḏua. We-were’a gena-ge manga 'ahu 'ofi-'ofi re raḏi ngaku mangale Ma Jou’ongu Madutu ḏuanga i’a 'o 'a’a 'oru, ga’a Ro sijaji ḏua. Ananga ḏi’i 'aḏi ta’aloko tamanga nau’u re sababu gena-ge ya sirousu manga diri. 6 Ngo Sara, Abraham 'ai were’a, mo 'a’a so’o gena ḏi’i. Munanga mo ta’aloko ra Abraham re mo 'aro’o unanga, 'ami tuanga. Na’o ngini ni mete’e ngo Sara 'ami de’oso re ḏegoro kama mojongo ua, ngini ma tero sa’olo ngo Sara 'ami ngowa-ngowa’a.✝3:6 Do. 18:12