2 Sababu gena-ge, ngini ni 'ahu-'ahu moju toma dungia, balasu ni mete’e Ma Jou’ongu Madutu 'ai 'akala ma mau re awa ni mete’e manusia manga nyafusu. 3 Ma siḏa ma di’ara ḏua, ngini ninga 'ahu ma duhu sa’olo ngowa-ngowa’a ga’a 'aḏi ngaku ua Ma Jou’ongu Madutu. Ngini ninga 'ahu mete’e dungia ma nyafusu: Ngini ni ka’e ni ma’eto-'etolo, re ni 'a’a laya kama 'atoranga ua, mete’e su-sudala, re silamo’o jou’ongu ma somoara. 4 Sababu gena-ge 'orasa nange-ne, ananga ga’a 'aḏi nana’o Ma Jou’ongu Madutu ua, ananga gena-ge 'aḏi kage re 'aḏi fitana ngini, sababu ananga 'aḏi oḏi’i ngini ninga 'ahu mete’e riwara manusia mo-moini manga nyafusu ma jira, ma tero sa’olo ananga ua. 5 Mada’a ḏuanga i’a ananga masiretene ya sitarangi mangale manga de’oso re ḏegoro ra Ma Jou’ongu Madutu ga’a ḏuanga i’a 'O sijuruhakimi ngowa’a 'ahu-'ahu re ngowa’a senge-sengene mo-moini. 6 Ma sababu gena-ge, Kristus 'a singadolo Habari Roanga toma ngowa’a ga’a 'aḏi dadi ngowa’a ngaku Yesus, mada’a nange-ne ananga gena-ge raḏi sengene. Gena-ge 'i dadi sababu Ma Jou’ongu Madutu ro sijuruhakimi ngowa’a gena-ge mete’e manga 'ahu, ma tero sa’olo 'O sijuruhakimi ngowa’a mo-moini, dadi ananga mo-moini gena-ge raḏi sengene. Mada’a ananga manga roh 'i tegoro toma soroga mete’e Ma Jou’ongu Madutu 'ai 'akala ma mau.

7 'Orasa dungia ma ḏo-ḏogumu sa’i ri ngadolo. Sababu gena-ge, ni siogoro tala ninga 'akala re sinyingara re ni ma’istiari, la ngini nga’unu manyiata ra Unanga reninga 'akala bo-boloto.