Yesus dadunu 'o sapolo moju
13 Ioronongoḏu ngo-ngaku rimoi, ngomi mi mau ngini mo-moini na waro mangale ngowa’a ngaku Yesus ga’a 'aḏi sengene pasala ḏua, la ngini ni rerese ma gaḏi awa ma tero sa’olo ngowa’a ngaku Yesus ua ga’a kamanga ngo-nganono ua. 14 Ngene wo ngaku mangale Yesus 'o sengene ḏua mada’a Ma Jou’ongu Madutu dadunu 'o si’ahu Unanga moju. Sababu gena-ge, ngene wo ngaku ḏi’i mangale ḏuanga i’a Ma Jou’ongu Madutu dadunu 'o si’ahu moju ngowa’a senge-sengene mo-moini ga’a ngowa’a ngaku Yesus, la ananga 'aḏi 'ahu marimoi ra Unanga.
15 Mangale do-doto’o ga’a ngomi mi dawongo ra Ma Jou, ngomi mau masingadolo ra ngini nena-ne: Wakutu Ma Jou Yesus ḏuanga i’a 'O sapolo moju, ngowa’a ngaku Yesus ga’a 'aḏi sengene siḏa, 'aḏi ma’u sanga ra Unanga gena-ge, kara ngene ḏi’i ga’a wo 'ahu moju wo ma’u sanga Unanga.4:15-17 1Kor. 15:51-52 16 Toma 'orasa gena-ge, mala’ekata ma sae’e unanga ḏuanga i’a 'o kanau 'o siduga-duga re 'o wusu Ma Jou’ongu Madutu 'ai torompet. Enanga gena-ge 'i dadi didina’o mangale Ma Jou masiretene 'O 'uci da’u soroga tala, kara Unanga 'o dadunu si’ahu moju ngowa’a ngaku Yesus ga’a raḏi sengene siḏa. 17 Gena ḏua, ngene wo 'ahu moju re ananga 'aḏi sengene siḏa, Ma Jou na tede singosama toma kakamo ma dara, la ngene ma’u sanga ra Unanga toma diwanga. Gena-ge ḏua, ḏuanga i’a ngene wo 'ahu marimoi ra Unanga kasingado-ngadolo i’a. 18 Sababu gena-ge, ngini mo-moini balasu ni ma’u site’e ninga 'akala re sinyingara matengo re matengo re demo-demo gena-ge.