3 Ma Jou’ongu Madutu 'ai 'akala ma mau nena-ne: Ngini ninga 'ahu balasu 'ofi-'ofi. Sababu gena-ge, ni sudala awa. 4 Nau’u balasu 'ahu loasa re banari taninga were’a, la ngini ni sisanangi Ma Jou’ongu Madutu 'ai 'akala re manusia manga 'akala re sinyingara ḏi’i.*4:4 bolo "Ngini balasu ma jaga ninga 'ahu awa na siḇisa ninga 'akala re sinyingara la ngini ni tinikai bolo sudala awa. Na’o so’o gena-ge ngini ni sisanangi Ma Jou’ongu Madutu 'ai 'akala re sinyingara re manusia manga 'akala re sinyingara ḏi’i." 5 Awa ngini ni mete’e ninga nyafusu ma jira ma tero sa’olo ngowa’a 'aḏi nana’o Ma Jou’ongu Madutu ua. 6 Toma dara ma tero so’o gena-ge, awa ngini ni 'a’a sala bolo ni sihaga taninga ioronongoḏu ngo-ngaku rimoi. 'Au wali, ngomi mi sipo-poma ḏua ra ngini sababu na’o ni 'a’a so’o gena, Ma Jou’ongu Madutu nu sihukumu. 7 I’a sa’olo Ma Jou’ongu Madutu 'aro’o ngene, la wo sudala?! Sanga ua! Siḏibo ḏi’i, la nanga 'ahu balasu 'i dadi 'ofi-'ofi.