1 Tessalonicenses 5

4 Mada’a ngini ioronongoḏu ngo-ngaku rimoi ga’a ni 'ahu toma hafu-hafu riwara, sababu ni nana’o Ma Jou Yesus. Sababu gena-ge, ngini kama heranga riwara wakutu enanga ma 'orasa 'i ngadolo ma tero sa’olo ngowa’a to-tori’i 'aḏi sapolo. 5 Ngini mo-moini sa’olo ngowa’a ngaku Yesus ga’a ni 'ahu re ninga de’oso re ḏegoro ma tero sa’olo ngowa-ngowa’a ga’a 'ahu toma tarangi ma dara, sababu ngini reni ngaku Yesus. Sababu gena-ge, ngene mo-moini wo si’a’a awa 'oru i’a ma jira, sababu ngene wo 'ahu toma hafu-hafu riwara. 6 Sababu gena-ge, ngene balasu pa’i maotu-otu awa ma tero sa’olo ngowa’a 'aḏi 'ahu toma hafu-hafu, ngene balasu ma’istiari re wo manahana nanga nyafusu ma jira sa’olo ngowa’a 'aḏi 'ahu toma tarangi. 7 Sababu toma wakutu lobi’i ngowa’a 'aḏi maotu-otu 'aḏi ma’istiari ua, re toma wakutu lobi’i ḏi’i ngowa’a 'aḏi dadi 'etolo re nga’unu ua manahana manga nyafusu ma jira. 8 Mada’a sababu ngene ne wo osama nyo-nyoimi toma ngowa’a ga’a 'aḏi 'ahu toma tarangi ma dara, ngene balasu wo manahana nanga nyafusu ma jira: Ngene balasu wo ngaku tau-taunu Ma Jou Yesus re wo dadalara ngowa’a lelegu. Na’o so’o gena-ge, ngene wo jaga nanga ngo-ngaku, la 'i elala ua ma tero sa’olo sordado 'o mapake baju jaga di’a 'o jaga 'ai diri. So’o gena ḏi’i, ngene balasu wo masinganono mode-mode’e mangale Ma Jou Yesus dadunu 'o sapolo moju di’a sisalamata ngene. Na’o so’o gena-ge, ngene wo jaga nanga ngo-nganono, la 'i sitaka-taka ua ma tero sa’olo sordado ga’a 'o mapake 'ai capeo waja di’a 'o jaga 'ai sae’e. Ḏua ngene wo ḏu-ḏuanga ḏua di’a Ma Jou Yesus 'o sapolo moju ma tero sa’olo sordado matengo 'o ḏuanga ḏua 'o osama jaga.✝5:8 Yes. 59:17; Ef. 6:13-17 9 Ma Jou’ongu Madutu 'o cumutu ngene di’a sihukumu ua mada’a na sisalamata ngene sababu nanga Jou Yesus Kristus 'ai se-sengene.