2 Coríntios 1

Paulus 'o sibere ie murasa ma la ra Ma Jou’ongu Madutu

3 Puji re silamo’o Ma Jou’ongu Madutu ga’a nanga Jou Yesus Kristus 'ai Ḇaḇa. Unanga gena-ge nanga Ḇaḇa ḏi’i ga’a 'O sijumu 'Ai 'akala re sinyingara ma la-la tau-taunu ra ngene re Ma Jou’ongu Madutu ga’a 'O site’e nanga 'akala re sinyingara. 4 Toma 'orasa ngomi mi basono kangela 'oru ḇato, Unanga 'o site’e minga 'akala re sinyingara. Dadi sababu ngomi remi basono de-de’e gena-ge ra Ma Jou’ongu Madutu ino, ngomi nga’unu site’e ngowa’a lelegu manga 'akala re sinyingara toma 'orasa ananga basono kangela 'oru ḇato ḏi’i. 5 Ma Jou Yesus Kristus 'a basono sangisara ma repe, re 'Ai sangisara gena-ge ngomi rema basono ḏi’i. Re ngomi sanga de-de’e 'i mamete’e rea Kristus ḏi’i. 6 Sababu gena-ge ngomi mi basono sangisara, la ngomi nga’unu mi site’e ninga 'akala re sinyingara, re la ngini ni basono Ma Jou’ongu Madutu 'ai salamata ḏi’i. Ma Jou’ongu Madutu ro site’e minga 'akala re sinyingara, la ngomi nga’unu mi site’e ḏi’i ngini ninga 'akala re sinyingara. Dadi ngini nga’unu matahana reninga 'akala ḇanyo wakutu ni basono sangisara. Sangisara gena-ge, ma tero sa’olo ngomi ḏi’i ga’a rema basono. 7 Sababu gena-ge, ngomi minga ngo-nganono 'i sitaka-taka ua mangale ngini nga’unu ni tahana sangisara tau-taunu. Sababu ngomi waro ngini reni basono sangisara ma tero sa’olo ngomi ḏi’i So’o gena ḏi’i, Ma Jou’ongu Madutu ḏuanga i’a 'o site’e ninga 'akala re sinyingara ma tero sa’olo Unanga 'o site’e minga 'akala re sinyingara.