11 Sababu gena-ge, ngomi mi silamo’o re mojongo nanga Jou Yesus sababu Unanga ḏuanga i’a 'O sijuruhakimi ngene. Dadi ngomi makutale mi baja ngowa-ngowa’a di’a 'aḏi ngaku Kristus. Ma Jou’ongu Madutu 'a waro ngomi minga 'akala re sinyingara ma dara re ngomi mi nganono ngini ḏi’i ni waro ngomi taninga 'akala re sinyingara ma dara. 12 Wakutu ngoi to kanau so’o gena-ge, ngomi mi matoro ua minga diri. Siḏibo ḏi’i, ngomi pa’i mi mau pula’a 'alasana rimoi ra ngini, la ngini nyengara ni sitoro mangale ngomi toma ngowa’a ga’a 'aḏi dawongo ngomi ua. Dadi ngini ni waro ma duhu sa’olo ngini balasu ni sangoro ngowa’a gena-ge ga’a pa’i matoro mangale manga 'ori i’a i’a ga’a nyengara maoḏi’i, mada’a manga 'akala re sinyingara ma dara 'i cira. 13 'Age mamuni’a ga’a 'aḏi ta’ajiri ngomi sa’olo ngowa’a pona. Gena-ge sababu ngomi mi munara reminga galasau’u, la mi sisanangi Ma Jou’ongu Madutu. 'Age mamuni’a ḏi’i 'aḏi ta’ajiri ngomi ma tero sa’olo ngowa’a 'akala romanga. Gena-ge sababu ngomi mi munara reminga galasau’u, la riono ngini. 14 Ngomi mi 'a’a so’o gena-ge sababu Kristus 'ai dadalara 'i sinyanyasele minga 'akala re sinyingara. Sababu ngomi mi ngaku mode-mode’e ga’a ngowa’a matengo 'O sengene di’a ngowa’a mo-moini. Sababu gena-ge, ma tero sa’olo ngowa’a mo-moini raḏi sengene. 15 Gena-ge ma ngale: Kristus ro sengene di’a 'o tuusu ngowa’a mo-moini, la ngowa’a 'aḏi 'ahu di’a pa’i 'aḏi sisanangi manga 'akala re sinyingara ḇato ua, mada’a di’a 'aḏi sisanangi Unanga 'ai 'akala re sinyingara. Unanga gena-ge ga’a Ro sengene, dadunu Ro 'ahu moju di’a ananga.

16 Sababu gena-ge, ngomi mi ta’ajiri riwara ngowa’a mete’e manusia manga fikirana. Kalaha, 'au nga’ene ngomi ḏi’i mi ta’ajiri Kristus, mete’e manusia manga fikirana. Mada’a 'orasa nange-ne, ngomi mi 'a’a so’o gena riwara. 17 Sababu gena-ge, na’o 'age rema ngowa’a ga’a raḏi marimoi ra Kristus, ananga gena-ge raḏi dadi manusia su-sungi. Manusia manga 'ahu ma siḏa ri cua. 'Orasa nange-ne, ananga manga 'ahu 'i dadi su-sungi. 18 Mo-moini gena-ge Ma Jou’ongu Madutu 'ai munara. Ma Jou’ongu Madutu 'o sirimoi ngene ra Unanga masiretene, sababu Kristus. Re Unanga 'o 'utusu ngomi di’a mi singadolo habari gena-ge toma ngowa-ngowa’a lelegu, la ananga nyengara 'aḏi sirimoi ra Ma Jou’ongu Madutu.

19 Gena-ge, ngomi ma singadolo habari mangale sababu Kristus 'ai se-sengene toma salib, Ma Jou’ongu Madutu nyengara 'o sirimoi manusia ra Unanga masiretene. Sababu gena-ge, Ma Jou’ongu Madutu 'o roimi riwara manusia manga ḏosa ga’a manusia raḏi 'a’a. Re Ma Jou’ongu Madutu ro pula’a tugasa ra ngomi di’a mi singadolo habari gena-ge.

20 Sababu gena-ge, ngomi remi dadi Kristus 'ai 'utusana. Enanga ma tero sa’olo Ma Jou’ongu Madutu masiretene 'o pake ngomi di’a siajele 'Ai demo-demo ra ngini. Dadi ngomi mi golo’o mode-mode’e ra ngini rea Kristus 'ai lomanga: Ni marimoi ra Ma Jou’ongu Madutu! 21 Kristus 'o 'a’a ḏosa ua, mada’a Ma Jou’ongu Madutu 'o 'a’a Unanga 'a doiti ngene nanga ḏosa. Ma Jou’ongu Madutu 'o 'a’a so’o gena, la ngene nyengara marimoi ra Unanga re kananga ḏosa ua ra Unanga 'ai momina.