6 'Elingi nena-ne: Ngowa’a ga’a 'aḏi maotomo repe ua, ḏuanga i’a ya 'utu’u ya sanga ma hasili repe ua ḏi’i. Mada’a ngowa’a ga’a 'aḏi maotomo lai repe, ḏuanga i’a ananga ya sanga ma hasili lai repe ḏi’i. 7 'A guna ḇato awa pula’a rai 'akala re sinyingara sitaka-taka, bolo sababu 'o masimau-mau. Siḏibo ḏi’i, matengo re matengo balasu 'o pula’a mete’e 'ai putusanga masiretene remanga 'akala re sinyingara sa-sanangi. Sababu Ma Jou’ongu Madutu 'o dadalara ngowa’a ga’a 'aḏi pula’a remanga 'akala re sinyingara sa-sanangi. 8 Sidogo ḏi’i, Ma Jou’ongu Madutu rai kuasa 'o pula’a barakati pai-pai’i ra ngini, la ngini ninga paralu kama kuranga ua. Siḏibo ḏi’i, ngini ninga paralu ni sanga pai’i tau-taunu. Unanga ḏuanga i’a 'o 'a’a so’o gena-ge, la ngini nga’unu ni madaga’a 'ori i’a ma la-la lebe dogo-dogo di’a ni riono ngowa-ngowa’a. 9 Gena-ge ma tero sa’olo toma Boku 'Ofi-'Ofi ri silefo mangale Ma Jou’ongu Madutu so’o ne:

"Unanga rai mura re dadalara 'o pula’a barakati toma ngowa-ngowa’a ma dinga’unu ua,

re 'Ai 'akala re sinyingara ma la-la, nena re si’a kasingado-ngadolo i’a."✝9:9 Nya. 112:9

10 Ma Jou’ongu Madutu masiretene 'o pula’a gisisi di’a ngowa’a ga’a siare gisisi re ma hasili di’a ngene wa oromo. So’o gena ḏi’i, Unanga gena-ge 'o pula’a ra ngini 'ori i’a mo-moini ga’a ni paralu re 'a dogo pai-pai’i. Dadi ngini nyengara dogo ni pula’a bu-bula’a toma ngowa’a lelegu.✝9:10 Yes. 55:10 11 Dadi ḏuanga i’a ngini ma tero sa’olo ngowa’a rema-enanga toma 'oru ḇato, la ngini nga’unu ni pula’a ninga bu-bula’a lai lamo’o reninga 'akala re sinyingara 'i sasalanga ua toma donga mo-moini. Re ninga bu-bula’a lai lamo’o gena-ge ga’a ngomi mi sibalangu, 'i si’a’a ngowa’a repe 'aḏi sibere ie murasa ma la ra Ma Jou’ongu Madutu. 12 Sababu ga’a ma la-la gena-ge, ngini na si’a’a pa’i sitotomo ananga manga paralu ḇato ua, mada’a 'i si’a’a ngowa’a repe 'aḏi sibere ie murasa ma la ra Ma Jou’ongu Madutu ḏi’i.