2 Timóteo 1

13 Nange-ne, ngana balasu na mete’e rani 'akala re sinyingara mode-mode’e do-doto’o banari; enanga gena-ge 'i dadi nana’o rimoi ga’a ngoi to pula’a ra ngana. Ngana balasu no macako’o ḇato tani ngo-ngaku re no dadalara ngowa’a lelegu. Gena-ge 'i nyengara, sababu wo marimoi ra Kristus Yesus. 14 Ma Ngagara 'Ofi-'Ofi, ga’a tananga 'akala re sinyingara ma dara, 'i riono ngene dadi ngana nga’unu na kadiarata la-la do-doto’o gena-ge, la guru sa-sakala 'aḏi sijira yoḏu’u. Do-doto’o gena-ge ga’a Ma Jou’ongu Madutu 'a siwatasa ḏua ra ngana.