2 Timotius 2

20 'Age toma wala lamo’o re rousu ma dara rema itomo ma pakakasa fara muḏuo i’a. 'Age fara moi si’a’a reo salaka, 'age fara moi si’a’a reo guraci re fara ḏiḏi gena-ge ya sipake di’a laya. 'Age ḏi’i fara moi si’a’a reo ate bolo reo tana’a re fara ḏiḏi gena-ge ya sipake di’a wange moi-wange moi. 21 Sababu gena-ge, ngowa-ngowa’a ga’a si’ofi manga 'ahu, ananga gena-ge 'aḏi dadi ma tero sa’olo itomo ma pakakasa di’a ya sipake wakutu manga laya. Ngowa’a gena-ge Ma Jou’ongu Madutu 'a pake sidadi itomo ma pakakasa, ra wola i’a di’a 'a sipake toma munara la-la.