1 Ngana na 'elingi-'elingi nena-ne: Wakutu Kiamata ma Wangere enanga 'i co-cori ngadolo, wa sanga ma susa re sangisara. 2 Toma 'orasa gena-ge, ngowa’a 'aḏi kalesanga pa’i manga 'ahu masiretene, 'aḏi mafikiri pa’i pipisi, 'aḏi matoro, 'aḏi momole, 'aḏi jajaha demo, 'aḏi 'isene bi-biri’i ua, 'aḏi si’a’a ua murasa ma la, re 'aḏi emono 'ori i’a 'ofi-'ofi. 3 Ananga 'aḏi ma’u dadalara ua matengo re matengo, 'aḏi ma’u si’apongo ua, 'aḏi nyanyaḏi ma’u sijira lomanga, 'aḏi siḏagi de’e, 'aḏi ruta-ruta re 'aḏi ḇusuru 'ori i’a la-la. 4 Ananga nyanyaḏi ma’u sijira, 'aḏi momole, re 'aḏi madibanga kiḏanga ua, ananga lebe nyanyaḏi dungia ma nyafusu, 'aḏi ḇusuru mete’e Ma Jou’ongu Madutu 'ai 'akala ma mau. 5 Wa oḏi’i i’a manga 'ahu ma duhu: Ananga ya mete’e re ya siḏagi manga 'agama ma 'atoranga, mada’a tamanga 'akala re sinyingara ma dara 'i kiḏanga ra Ma Jou’ongu Madutu. Sababu gena-ge, ngana no maki-kiḏanga toma ngowa-ngowa’a gena-ge!

6 'Age tamanga sigolona, ngowa’a ga’a 'aḏi mete’e ua Ma Jou’ongu Madutu 'ai do-doto’o gena-ge. Guru-guru sa-sakala gena-ge 'aḏi supu osama wala-wala re 'aḏi sihaga we-were’a--we-were’a ga’a manga 'akala re sinyingara mereoso re manga ḏosa lai repe re manga nyafusu lai repe ḏi’i. 7 We-were’a--we-were’a gena-ge 'aḏi golo’o tau-taunu do-doto’o mada’a wakutu ngowa’a 'aḏi pula’a do-doto’o banari gena-ge ra ananga, soi moi nyangu we-were’a--we-were’a gena-ge ya sahe do-doto’o gena-ge. 8 Guru-guru sa-sakala gena-ge ma tero sa’olo 'a Yanes re Yambres ga’a 'ua re 'au wali 'aḏi malawana 'a Musa. So’o gena ḏi’i, guru sa-sakala gena-ge 'aḏi dola’aku do-doto’o ra Ma Jou’ongu Madutu ino. Ananga manga 'akala re sinyingara 'i kaco re manga ngo-ngaku pa’i taḇe i’a. Sababu gena-ge Ma Jou’ongu Madutu dawongo ananga ua.✝ 9 Ngowa-ngowa’a gena-ge manga do-doto’o 'i rera re walata ua re ḏuanga i’a sanga 'oru-'oru ua. Sababu ngowa’a ya waro ananga manga do-doto’o 'i banari ua, ma tero sa’olo 'a Yanes re 'a Yambres manga do-doto’o 'i banari ua ḏi’i.

10 Mada’a ngana no waro ḏua ngoi 'ari do-doto’o, ngoi 'ari de’oso re ḏegoro, re 'ari 'ahu ma maksudu. Ngana masiretene no oḏi’i ḏua 'ari ngo-ngaku mode-mode’e ra Yesus re to dadalara 'a guna ḇato. Ngana ḏi’i no waro ḏua ngoi 'ari 'akala ḇanyo re ma duhu sa’olo ngoi to manahana wakutu ngoi ta basono susa re sangisara. 11 Ngana no oḏi’i ḏua ma duhu sa’olo ngoi to manahana wakutu ta sanga enanga ma sangisara re sikisa toma limau Antiokhia, limau Ikonium re toma Limau Listra. Mo-moini gena-ge, ngana no oḏi’i re no waro ḏua mada’a mo-moini gena-ge Ma Jou’ongu Madutu 'a silalo’o ra ngoi.✝ 12 'A guna ḇato mau 'ahu, la ananga 'aḏi sisanangi Ma Jou’ongu Madutu 'ai 'akala re sinyingara re 'ahu marimoi ra Kristus Yesus, ananga gena-ge ḏuanga i’a sanga sikisa. 13 Ngowa-ngowa’a ga’a manga 'akala re sinyingara 'i cira, re ngowa-ngowa’a ga’a sihaga ngowa’a, ananga gena-ge manga 'akala re sinyingara ma jira 'i ganapu madogo-dogo ḇato. Ananga mau sihaga ngowa’a lelegu. Momongolo ua ananga 'aḏi masihaga tala manga diri ḏi’i!

14 Mada’a ngana Timotius, ngana balasu na cako’o namo-namoto do-doto’o banari ga’a sidoto’o ḏua ra ngana, re ga’a ngana na ngaku mode-mode’e, sababu ngana no waro 'ani guru-guru ga’a 'aḏi sidoto’o do-doto’o banari gena-ge ra ngana. 15 Ngana balasu no 'elingi tau-taunu mangale wakutu no ce-ceka’a ie moju, ngana reno sahe Boku 'Ofi-'Ofi ga’a pula’a wo-waro toma ngowa’a, la ngowa’a nyengara 'aḏi sanga salamata sababu manga ngo-ngaku ra Yesus Kristus. 16 Mo-moini gena-ge 'i silefo ḏua toma Boku 'Ofi-'Ofi ma dara, enanga gena-ge ra Ma Jou’ongu Madutu ino. Boku 'Ofi-'Ofi gena-ge rema faeda di’a ngowa’a ga’a doto’o do-doto’o banari, di’a ḇangata re sidiai 'ori i’a ma rapu, re sidoto’o ngowa’a, la 'aḏi 'ahu mete’e Ma Jou’ongu Madutu 'ai 'akala ma mau ḇato. 17 Dadi ngowa’a ga’a de-de’oso Ma Jou’ongu Madutu, ananga nga’unu 'aḏi siḏagi tamanga munara 'oru ḇato 'i ti-tiai.