1 Gena ḏua, ngoi ta oḏi’i didina’o heranga ma lamo’o rimoi toma diwanga: 'Age we-were’a matengo mo masao reo wangere ma la’o sa’olo 'ami pakeanga, mo made-de’oso toma ngara. Tami sae’e 'age rema lastari ga’a si’a’a reo mumuḏungu guḏi moi re ngai ḏiḏi. 2 We-were’a gena-ge rami lese re 'ami 'orasa ma ḏe-ḏegoro i’a ri ngadolo, munanga mo poa’a sababu mo go-goḏi.

3 'Age rema didina’o heranga ma lelegu 'i dadi toma diwanga: Naga ko-kolili ngai moi 'i lamo’o masala! Naga gena-ge ma sae’e tumudingi rema lastari mo-moini re ma tadu’u guḏi moi.✝12:3 Dan. 7:7 4 Enanga ma di’imi 'i iḏala mumuḏungu toma diwanga ma balangu rimoi toma balangu ro’ange ma dara, kara ya sipoini toma dungia. Naga gena-ge 'i made-de’oso toma we-were’a 'ami biono, munanga ga’a sa’i mo maḏe-ḏegoro. Ma maksudu naga gena-ge ya nyamolo 'ami ngowa kiau na’o mo maḏe-ḏegoro i’a.✝12:4 Dan. 8:10 5 Ḏua we-were’a gena-ge mo maḏe-ḏegoro i’a Ngowa’a Nau’u ga’a ḏuanga i’a 'O parenta toma bangsa mo-moini reo didiki ḇesi. Mada’a Ngowa Kiau gena-ge mala’ekata 'U rabasa Tai ngina, kara 'U gasa ra Ma Jou’ongu Madutu 'ai ḏe-ḏegoro.✝12:5 Yes. 66:7; Nya. 2:9 6 Ḏua we-were’a gena-ge mo wiḏi toma ngi’i baulaco ga’a Ma Jou’ongu Madutu 'a sidodahe di’a munanga. Toma ngi’i gena-ge, munanga mo sanga kadiarata ma di’ara wangere cala moi re latu ḏiḏi re nyagi rarama.

7 Ḏua toma soroga 'i dadi parangi. Mala’ekata Mikhael ga’a mala’ekata ma sae’e rai mala’ekata-mala’ekata, ananga gena-ge 'aḏi parangi naga. Re naga gena-ge rema mala’ekata-mala’ekata ḏi’i, ananga ya’u parangi 'a Mikhael.✝12:7 Dan. 10:13, 21, 12:1; Yud. 9 8 Mada’a naga gena-ge rema mala’ekata-mala’ekata, ananga gena-ge 'aḏi te’e ua. Dadi naga rema mala’ekata-mala’ekata ya simaha ua 'i tegoro toma soroga. 9 Naga lamo’o re ma mala’ekata-mala’ekata gena-ge siupa’a toma dungia. Naga gena-ge 'o ngorana ma biri’i, ma lomanga 'Iblisi bolo Roh ma Jira ma 'Olana*12:9 "Roh ma Jira ma 'Olana" ma tero sa’olo Satan. ga’a 'i sihaga ngowa’a toma dungia.✝12:9 Do. 3:1; Luk. 10:18

10 Ḏua ngoi to 'isene iḏingi siduga-duga toma soroga ma betongo so’o ne:

"Nange-ne enanga ma 'orasa nanga Jou’ongu Madutu di’a Unanga 'o sisalamata 'Ai 'umata.

Nange-ne enanga ma 'orasa Ma Jou’ongu Madutu 'a sijumu 'Ai kuasa sa’olo 'Olana.

Nange-ne enanga ma 'orasa 'O Salamata ma Cimi, ga’a 'O sijaji pasala ḏua, 'O sijumu 'Ai kuasa toma dungia sitabi donga.

Sababu 'Iblisi ga’a 'i kalaki nanga ioronongoḏu ngo-ngaku rimoi tananga Jou’ongu Madutu 'ai biono lobi’i re wangere, Enanga gena-ge 'i sisupu ḏua toma soroga!✝12:10 Ayb. 1:9-11; Za. 3:1

11 Nanga ioronongoḏu ngo-ngaku rimoi, ananga raḏi sieta’a 'Iblisi,

sababu Doba ma Ngowa 'ai ngaunu 'i tuusu ananga gena-ge tamanga ḏosa

re sababu ḏi’i manga sakisi mangale Yesus manga Jou.

Kalaha 'aḏi sanga sikisa re 'aḏi sisengene, ananga lebe dadalara Yesus reo manga 'ahu.

12 Sababu gena-ge ni maroanga, ngini mala’ekata-mala’ekata

re ngowa’a mo-moini ga’a ni tegoro toma soroga!

Mada’a ngowa’a ga’a 'aḏi 'ahu toma dungia re ngoloto, ngini ḏuanga i’a ni sanga bahala,

sababu 'Iblisi ri 'uci re 'i maruta ra ngini.

Sababu 'Iblisi gena-ge ya waro ma 'orasa ti’ara riwara singadolo sanga hukumu ma ḏo-ḏogumu."

13 Wakutu naga gena-ge 'i mabasono tala mangale enanga siupa’a ḏua toma dungia, enanga mulaingi 'i kunu’i we-were’a ga’a mo maḏe-ḏegoro i’a Ngowa’a Nau’u. 14 Mada’a we-were’a gena-ge sanga kareba ma kalatu’u romoḏiḏi, la munanga nyengara mo soloro toma ngi’i baulaco ma ki-kiḏanga toma naga gena-ge. I’a da’a, munanga ḏuanga i’a sanga kadiarata ma di’ara musungu ro’ange rema jule.✝12:14 Dan. 7:25, 12:7 15 Ḏua naga gena-ge ya sisupu ḇanyo lamo’o masala toma madanga siḇucu i’a toma we-were’a gena-ge, la munanga mo rarini. 16 Mada’a tana’a ya welanga ma madanga di’a 'i riono munanga re ya ḇowisi ḇanyo ga’a naga ya siḇucu nange-ge! 17 Naga gena-ge 'i ruta masala toma we-were’a gena-ge singadolo enanga 'i tagi 'i parangi toma we-were’a gena-ge 'ami ju’uda: gena-ge ananga ga’a 'aḏi mete’e Ma Jou’ongu Madutu 'ai parenta re ga’a 'aḏi pula’a sakisi mangale Yesus, re Unanga 'ai kuasa tamanga 'ahu. 18 Naga gena-ge 'i made-de’oso toma ngoloto ma 'uḏu.