Tingoḏi'i 14

Doba ma Ngowa re 'Ai ngowa-ngowa’a

1 Gena ḏua, ngoi to oḏi’i Doba ma Ngowa 'o made-de’oso toma Kie Sion. Ngowa’a nga cala latu moi re cala nyagi rata re rata (144,000) 'aḏi mamete’e ra Unanga. Tamanga memese matengo re matengo gena-ge 'i silefo Doba ma Ngowa ma lomanga re ma Ḇaḇa 'ai lomanga ḏi’i.✝14:1 Yeh. 9:4; Ting. 7:3 2 Ḏua ngoi to 'isene iḏingi da’u soroga tala sa’olo duduala ma rurusu re sa’olo murasa 'i te’iri lai siḏi. Ma iḏingi gena-ge ta 'isene sa’olo ngowa’a ḇisa-ḇisa kecapi 'aḏi ḇisa manga kecapi. 3 Ngowa’a nga cala latu moi re cala nyagi rata re rata (144,000) gena-ge 'aḏi manyanyi nyanyi su-sungi ra Ma Jou’ongu Madutu 'ai ḏe-ḏegoro ma biono re makhluk nga ḏuata re bi-biri’i--bi-biri’i ma biono, mo-moini ga’a sigoloḏi 'Ai ḏe-ḏegoro gena-ge. Nyanyi gena-ge matengo i’a mai ua nga’unu 'o manyanyi, ḏuga-ḏuga ananga nga cala latu moi re cala nyagi rata re rata (144,000) ḇato; ananga gena-ge ga’a sanga salamata ḏua. 4 Ananga gena-ge ngowa-ngowa’a 'ofi-'ofi*14:4 Ananga gena-ge ngowa’a 'ofi-'ofi sababu pa’i 'aḏi silamo’o re siḏubuso Ma Jou’ongu Madutu ḇato. ma tero sa’olo na-nau’u waro 'oru nyangu sababu 'aḏi sebanga we-were’a nyangu. Ananga gena-ge mete-mete’e tau-taunu Doba ma Ngowa’a le’a ḇato, Enanga 'i tagi. Toma ngowa’a mo-moini manga sigolona, ananga gena-ge raḏi salamata sa’olo hasili ma jomolo ra Ma Jou’ongu Madutu re Doba ma Ngowa. 5 Soi moi i’a mai nyangu ananga raḏi sa-sakala ngowa’a re ananga kamanga faja ceka’a i’a mai ua.✝14:5 Zef. 3:13