Tingoḏi'i 3

Habari di’a jama’ata Sardis

1 Yesus gena-ge 'o kanau ra ngoi ḏi’i, "Toma jama’ata Sardis ma mala’ekata, na lefo so’o ne:

Nena-ne habari ra Ngoi ga’a to parenta Ma Jou’ongu Madutu 'ai Roh tumudingi*3:1 "Roh tumudingi" ma tero sa’olo Ma Ngagara 'Ofi-'Ofi. "Tumudingi" ma ngale Roh ga’a 'i ti-tiai. Yes. 11:2; Za. 4:2, 10; Ting. 1:4, 4:5, 5:6. re to gu’u mumuḏungu ngai tumudingi Tari giama ma kuwiḏa. Ngoi ta waro mangale ninga de’oso re ḏegoro: Ngowa’a 'aḏi aje, ngini ni 'ahu-'ahu. Mada’a, mete’e ngoi, ngini rini sengene!

2 Sababu gena-ge, ni momi’i re ma’istiari! Ngini ninga ngo-ngaku 'i sengene moini nyangu, dadi ninga ngo-ngaku ma jingianga gena-ge ni mate’e. Sababu 'oru ga’a ngini ni 'a’a, rimoi i’a mai nyangu Ngoi ta sanga ti-tiai Tari Jou’ongu Madutu 'ai momina.