Apocalipse 5

Doba ma Ngowa 'i dawongo kartasi lolo moi ya side-dege ma segele ngai tumudingi reo toca

1 Gena ḏua, ngoi to oḏi’i Ma Jou’ongu Madutu 'o tegoro ra Ma 'Olana 'ai ḏe-ḏegoro re Tai giama ma kuwiḏa 'o gu-gu’u kartasi lolo moi; ma biono re ma ḏuḏunu 'i silefo mo-moini. Kartasi lo-lolo gena-ge ya side-dege ma segele ngai tumudingi reo toca.✝5:1 Yeh. 2:9-10; Yes. 29:11 2 Ḏua ngoi to oḏi’i mala’ekata matengo ga’a 'o lamo’o reo kau’u reo te’e re 'o kanau siduga-duga, " 'A guna patasa di’a 'a woi’i ma segele-segele gena-ge re 'a welanga ma kartasi lo-lolo gena-ge?" 3 Mada’a bae toma soroga bae toma dungia, bolo dau toma tana’a ma dara, matengo i’a mai ua patasa di’a 'a welanga kartasi lo-lolo gena-ge re 'a oḏi’i ma dara. 4 Dadi ngoi ta rerese ma gaḏi singadolo to jomo-jomo sababu matengo i’a mai ua patasa di’a 'a welanga kartasi lo-lolo gena-ge re 'a oḏi’i ma dara. 5 Ḏua toma bi-biri’i--bi-biri’i manga sigolona, 'age matengo 'o kanau ra ngoi, "Na rerese ma gaḏi rawara! Oḏi’i Singa*5:5 Singa gena-ge Yesus ma 'asala toma bangsa Yahudi ino ra 'Olana Daud 'ai ju’uda re Ro 'utungu. Unanga gena-ge patasa di’a 'a woi’i segele ngai tumudingi re 'a welanga kartasi lo-lolo gena-ge."✝5:5 Do. 49:9; Yes. 11:1, 10

6 Gena ḏua, ngoi to oḏi’i Doba ma Ngowa rimoi 'i te’oso co-cori ra ma 'Olana 'ai ḏe-ḏegoro ma gagoro, makhluk rata re bi-biri’i--bi-biri’i mo-moini ananga gena-ge ya sigoloḏi Enanga. Doba ma Ngowa gena-ge 'age ma ḇokeke ga’a 'i sijumu ngowa’a ya tola’a ḏua. Enanga ma tadu’u ngai tumudingi re ma la’o ngai tumudingi ḏi’i. Ma la’o ngai tumudingi gena-ge ma ngale Ma Jou’ongu Madutu 'ai Roh tumudingi,*5:6 "Roh tumudingi" ma tero sa’olo Ma Ngagara 'Ofi-'Ofi. "Tumudingi" ma ngale Roh ga’a 'i ti-tiai. Yes. 11:2; Za. 4:2, 10; Ting. 1:4, 3:1, 4:5 ga’a Unanga 'a 'utusu ḏua toma dungia sitabi donga.✝5:6 Yes. 53:7; Za. 4:10 7 Doba ma Ngowa gena-ge i’a ya 'oro kartasi lo-lolo gena-ge ra Ma Jou’ongu Madutu 'ai giama ma kuwiḏa ga’a tegoro ra Ma 'Olana 'ai ḏe-ḏegoro. 8 Wakutu Doba ma Ngowa ya 'a’a so’o gena, makhluk rata gena-ge re bi-biri’i nga nyagi romoḏiḏi re nga ḏuata ananga gena-ge 'aḏi mapagara manga biono tala toma Doba ma Ngowa ma biono. Ananga matengo re matengo 'aḏi gu-gu’u kecapi re sawo’o guraci ma dara rema manyanyi. Manyanyi gena-ge ma ngale: Ma Jou’ongu Madutu 'ai ngowa-ngowa’a manga nyiata.✝5:8 Nya. 141:2 9 Re ananga gena-ge 'aḏi manyanyi nyanyi su-sungi rimoi.

"Doba ma Ngowa 'I patasa ḇato di’a 'oro kartasi lo-lolo gena-ge re 'I woi’i ma segele.

Sababu Enanga ngowa’a ya tola’a ḏua,

re Ma ngaunu 'i pa’ala, la 'I tuusu ngowa-ngowa’a

toma suku mo-moini, demo-demo mo-moini, nagara mo-moini re bangsa mo-moini di’a Ma Jou’ongu Madutu.✝5:9 Nya. 33:3, 98:1; Yes. 42:10

10 Doba ma Ngowa ri cumutu ananga 'aḏi osama nyo-nyoimi Ma Jou’ongu Madutu 'ai Pareta

re 'I cumutu ananga sa’olo 'imam-'imam,

la 'aḏi de-de’oso nanga Jou’ongu Madutu,

re 'aḏi pareta toma dungia sitabi donga."✝5:10 Sup. 19:6; Ting. 1:6

11 Gena ḏua, ngoi to oḏi’i re to 'isene mala’ekata manga repe masala manga iḏingi ga’a ngoi to waro ma repe ua, ananga 'aḏi sigoloḏi Ma 'Olana 'ai ḏe-ḏegoro, makhluk rata re bi-biri’i--bi-biri’i.✝5:11 Dan. 7:10 12 Re ananga 'aḏi manyanyi ya siduga-duga so’o ne:

"Doba ma Ngowa ga’a ya tola’a ḏua gena-ge,

Enanga 'i patasa di’a ngene wa puji re silamo’o sababu Enanga ma kuasa, Ma harata, Ma 'akala ma soro’unu re Ma de-de’e.

Pa’i Enanga gena-ge ngene wa silamo’o madutu re wa simulia!"

13 Ḏua ngoi to 'isene makhluk mo-moini ma iḏingi: bae toma diwanga, bae toma dungia, bae toma tana’a ma dara, toma ngoloto -- ḇoko’o ḇato: Makhluk mo-moini toma dungia sitabi donga -- mo-moini 'i manyanyi so’o ne:

"Ma Jou’ongu Madutu ga’a tegoro ra Ma 'Olana 'ai ḏe-ḏegoro,

re Doba ma Ngowa.

Ananga gena-ge ngene wa’u silamo’o madutu re wa’u puji re silamo’o re wa’u simulia,

re pa’i Ananga ḇato remanga kuasa kasingado-ngadolo i’a!"

14 Dadi makhluk rata nange-ge 'i sangoro, " 'Amin!" Re bi-biri’i--bi-biri’i gena-ge, ananga 'aḏi mapagara manga biono tala, kara 'aḏi silamo’o re siḏubuso Ma Jou’ongu Madutu re Doba ma Ngowa.