Kolose 1

Kristus re 'Ai munara

15 Ngene wo oḏi’i yoḏu’u Ma Jou’ongu Madutu mada’a 'a Kristus unanga gena-ge Ma Jou’ongu Madutu 'ai gabara mode-mode’e. Kristus 'o parenta Ma Jou’ongu Madutu 'ai do-dadi mo-moini, ma tero sa’olo ngowa’a nau’u ma jomolo ga’a 'o parenta 'ai nongoḏu, 16 sababu Ma Jou’ongu Madutu 'U 'utusu Unanga gena-ge 'o sidadi 'ori i’a mo-moini: bae toma soroga, bae toma dungia: bae 'ori i’a i’a ga’a wa oḏi’i, bae 'ori i’a i’a ga’a wa oḏi’i ua. So’o gena ḏi’i bae roh, bae mala’ekata ga’a 'i parenta rema kuasa. Mo-moini gena-ge Kristus 'a sidadi, la mo-moini gena-ge 'i simulia Unanga. 17 'Ori i’a mo-moini toma dungia nena-ne 'i cua moju, Kristus 'age rema enanga ḏua. Re Unanga 'a siḏe-ḏegoro 'ori i’a mo-moini ma ngi’i, re ḏi’i Unanga 'a parenta. 18 Kristus gena-ge 'Ai kuasa ma pari cua toma jama’ata ma tero sa’olo sae’e 'i kuasa toma lese. Unanga jama’ata manga 'ahu ma cimi sababu Unanga ma mulaingi dadunu Ro 'ahu moju toma ngowa’a senge-sengene manga sigolona ma tero sa’olo ngowa nau’u ma jomolo. Dadi pa’i Unanga masiretene ḇato 'o kuasa lai lamo’o re lai kau’u toma 'ori i’a i’a mo-moini,✝1:18 Ef. 1:22-23 19 sababu Ma Jou’ongu Madutu 'o sitantukanga pasala ḏua 'Ai duhu re 'Ai kuasa mo-moini kama kuranga ua 'a sipa’ala Tai Ngowa’a Nau’u, Kristus. 20 'Ua re 'au wali moju, Ma Jou’ongu Madutu 'o sitantukanga ḏua 'O sirimoi moju 'ori i’a mo-moini: bae toma soroga, bae toma dungia, ra Unanga masiretene. Unanga ro 'a’a so’o gena-ge sababu 'a Kristus 'ai ngaunu ri pa’ala di’a ngene wakutu 'O sengene toma salib.✝1:20 Ef. 2:16