Efesus 1

Paulus 'o manyiata

15,16 Dadi ngini reni osama nyo-nyoimi ra Ma Jou’ongu Madutu 'ai 'umata. Sababu gena-ge, ngoi kama togumu ua to sibere ie 'ari murasa ma la ra Ma Jou’ongu Madutu mangale ngini, sababu ngoi reto 'isene ngini reni ngaku Ma Jou Yesus re ni dadalara Ma Jou’ongu Madutu 'ai 'umata. Wakutu ngoi to manyiata to terongo tau-taunu ninga lomanga. 17 Ngoi to manyiata tau-taunu to golo’o tananga Ḇaḇa ga’a 'o mulia, Unanga gena-ge nanga Jou Yesus Kristus 'ai Jou’ongu Madutu, mangale Ma Ngagara 'Ofi-'Ofi ḏuanga i’a 'i pula’a 'akala ma soro’unu re 'i sijumu Ma Jou’ongu Madutu ra ngini, la ngini ni nana’o Unanga mode-mode’e: 18 Dadi ngini ninga fikirana 'i dadi tarangi mangale barakati di’a ngini. Barakati gena-ge ga’a ninga ngo-nganono, sababu Unanga ro 'aro’o ngini. Re ngini balasu ni sahe mode-mode’e mangale Ma Jou’ongu Madutu 'ai barakati ma mulia Ra sidodahe di’a 'Ai 'umata. 19 Re ḏi’i ngini ni waro Unanga 'ai kuasa ma pari cua ga’a 'i munara ra ngene, ngowa’a ga’a rewo ngaku Unanga. Kuasa gena-ge ma pari cua 20 ga’a Unanga ra sipake di’a dadunu 'O si’ahu moju Kristus tai se-sengene re 'U sitegoro Tai giama ma kuwiḏa i’a toma soroga.✝1:20 Nya. 110:1

21 Kristus 'ai ḏe-ḏegoro gena-ge lebe kau’u reo pamarenta mo-moini, ngowa’a mo-moini remanga kuasa, ngowa’a bi-biri’i mo-moini, tuanga mo-moini re 'a guna ḇato manga ḏe-ḏegoro kau’u, bae 'aḏi 'ahu 'orasa nange-ne, bae toma biono i’a. 22 Re Ma Jou’ongu Madutu 'a sita’aloko mo-moini ra Kristus 'ai kuasa ma 'aḏu. Re Kristus gena-ge, ga’a 'O parenta mo-moini, 'o dadi jama’ata manga sae’e.✝1:22 Nya. 8:6 23 Jama’ata gena-ge 'a Kristus 'ai lese. 'Ai jama’ata gena-ge, 'oru ḇato re ngi’i le’a ḇato, Unanga 'a sitomoto reo 'Ai 'ahu.✝1:22-23 Kol. 1:18