11 Sababu gena-ge, ioronongoḏu ngo-ngaku rimoi, ngini ni sibuoro sa’olo ngowa’a Yahudi ua, 'elingi ninga 'ahu ma siḏa: Ngowa’a Yahudi ga’a 'aḏi mafikiri pa’i ananga ḇato Ma Jou’ongu Madutu 'ai 'umata sababu ananga raḏi masuna mete’e Musa 'ai hukumu. Ananga gena-ge 'aḏi si’aro’o ngini "ngowa’a masuna ua". Mada’a suna gena-ge, manusia ya 'a’a tamanga lese ḇato. 12 'Elingi toma 'orasa gena-ge, ngini ni marimoi ra Kristus nyangu, re ni osama nyo-nyoimi ua toma ngowa’a Yahudi ga’a ma 'asala toma Israel ino. Dadi 'oru ḇato ga’a Ma Jou’ongu Madutu ro sijaji di’a ngowa’a Yahudi, ngini ḏuanga i’a sanga ma balangu ua. Ngini ni 'ahu toma dungia, mada’a ngini ni nana’o ua Ma Jou’ongu Madutu dadi ni masinganono yoḏu’u ra Unanga di’a 'O sisalamata ngini. 13 'Au nga’ene, ngini ni kiḏanga ra Ma Jou’ongu Madutu. Mada’a 'orasa nange-ne, sababu Kristus 'ai ngaunu ngini reni masebanga ra Ma Jou’ongu Madutu sababu ngini ni marimoi ra Kristus Yesus.