Efesus 3

Paulus 'o manyiata di’a jama’ata Efesus

14 Sababu mo-moini gena-ge, ngoi to maḏipolono di’a to manyiata ra Ma Jou’ongu Madutu, nanga Ḇaḇa. 15 Unanga ga’a Ro dadi ngowa’a ngaku Yesus mo-moini manga Ḇaḇa. Re ananga gena-ge raḏi dadi 'Ai ngitu re ngale: bae toma soroga, bae toma dungia. 16 Ngoi to manyiata ra Ma Jou’ongu Madutu ga’a 'o tegoro toma mulia ma pari cua, re 'Ai barakati kama moini ua. Ngoi to manyiata to golo’o ra Unanga gena-ge mangale 'Ai Ngagara 'Ofi-'Ofi 'i site’e ngini ninga 'akala re sinyingara. 17 Ḏua 'a Kristus 'o tegoro tau-taunu ra ngini ninga 'akala re sinyingara sababu ninga ngo-ngaku. Ḏua ngini ninga 'ahu 'i romanga reo dadalara ma tero sa’olo ate ma utu’u 'i osama lai kiḏanga toma tana’a ma dara re ma tero ḏi’i sa’olo simomi’i wala toma bangini te-te’e ma re’u. 18 Ngoi to manyiata so’o gena-ge, la ngini mamete’e ra Unanga 'ai 'umata mo-moini, nga’unu ni basono Kristus 'ai dadalara lai lamo’o ra ngene: wa waro enanga ma giḏanga, ma roata, ma gau’u re ma ngido. 19 'Ai dadalara gena-ge ngene wa du-dumunu yoḏu’u renanga 'akala. Kalaha so’o gena, ngoi to golo’o ra Ma Jou’ongu Madutu mangale ngini ni basono Kristus 'ai dadalara. Dadi ngini ninga 'akala re sinyingara 'i romanga reo Kristus 'ai dadalara di’a ngini, ma tero sa’olo Ma Jou’ongu Madutu 'o romanga reo dadalara.