Sirimoi sa’olo 'a Kristus 'ai lese
1 Sababu gena-ge, ngoi -- ga’a to osama bui sababu 'ari munara di’a Ma Jou’ongu Madutu -- to golo’o mode-mode’e ra ngini mangale ninga 'ahu balasu 'i patasa sa’olo ngowa’a ga’a Ma Jou’ongu Madutu ro 'aro’o di’a dadi 'Ai ngowa-ngowa’a masiretene. 2 Ngini balasu ni maholo ninga 'akala re sinyingara, 'akala re sinyingara mereoso, pake 'akala ḇanyo, ni manahana ninga diri sababu ninga dadalara di’a ngowa’a lelegu, wakutu manga de’oso re ḏegoro 'i ma’u rapu ra ngini.4:2 Kol. 3:12-13 3 Ma Ngagara 'Ofi-'Ofi ri sirimoi ngini, dadi ngini balasu ni makutale mode-mode’e di’a ni 'ahu toma dame, la ni 'ahu marimoi tau-taunu. 4 Ngene mo-moini ga’a ngowa’a ngaku Yesus ma tero sa’olo lese rimoi re pa’i Ma Ngagara 'Ofi-'Ofi rimoi ḇato 'i tegoro tananga 'akala re sinyingara. So’o gena ḏi’i, ngene renanga ngo-nganono pa’i rimoi ḏi’i, sababu Ma Jou’ongu Madutu ro 'aro’o ngene wo dadi 'Ai 'umata. 5 Ma Jou pa’i matengo ḇato, nanga ngo-ngaku rimoi, sanga baptis toma lomanga ma tero, 6 re Ma Jou’ongu Madutu pa’i matengo ḇato 'O dadi Ḇaḇa di’a ngowa’a ngaku Yesus mo-moini. Unanga rai kuasa 'O parenta mo-moini, 'O munara toma 'ori i’a mo-moini re 'O tegoro taninga 'akala re sinyingara mo-moini ga’a ngowa’a ngaku Yesus.
7 Mada’a ngene matengo re matengo wo dawongo cocatu ma tero ua di’a wo 'a’a Ma Jou’ongu Madutu 'ai munara 'i mete’e 'oru ga’a Kristus 'O siwatasa ḏua. 8 Sababu gena-ge, toma Boku 'Ofi-'Ofi ma dara 'i silefo so’o ne:
"Wakutu Unanga 'o pere toma ngi’i lai kau’u,
'O gasa dawana manga repe.
Re Unanga 'o pula’a cocatu-cocatu toma manusia."4:8 Nya. 68:19
9 Nah na’o wo aje, "Unanga 'o pere," gena-ge ma ngale Unanga ro 'uci ḏua ngadolo toma ngi’i dau 'aḏu. Gena-ge ma ngale toma dungia nena-ne. 10 Re Unanga ga’a ro 'uci ḏua, Unanga gena-ge ḏi’i ga’a ro pere lebe kau’u reo diwanga, la Unanga 'o parenta 'ori i’a mo-moini. 11 Unanga gena-ge, " 'O pula’a cocatu toma manusia," la 'age rema ngowa’a 'aḏi dadi Yesus 'ai so-soma’a, 'age rema ngowa’a 'aḏi dadi nabi, 'age rema ngowa’a ga’a 'aḏi singadolo Habari Roanga, re guru-guru ga’a 'aḏi doto’o ngowa’a ngaku Yesus. 12 Unanga 'o 'a’a so’o gena-ge, la Ma Jou’ongu Madutu 'ai 'umata kama kuranga ua di’a nga’unu munara ra Ma Jou’ongu Madutu re site’e jama’ata ga’a ma tero sa’olo Kristus 'ai lese.