Efésios 5

22 Were’a balasu ni ta’aloko taninga nau’u, ma tero sa’olo ni ta’aloko ra Ma Jou.✝5:22 Kol. 3:18; 1Pet. 3:1 23 Nau’u 'o dadi sae’e tai were’a, ma tero ḇato sa’olo Kristus 'o dadi sae’e Tai jama’ata. Re Unanga masiretene 'a sisalamata ngowa-ngowa’a ngaku Unanga; ananga gena-ge ga’a ma tero sa’olo bageanga-bageanga Tai lese. 24 Ma tero sa’olo jama’ata ta’aloko ra Kristus, so’o gena ḏi’i toma 'oru ḇato were’a balasu ta’aloko tami nau’u.

25 Nau’u balasu ni dadalara ninga were’a ma tero sa’olo Kristus 'o dadalara 'Ai jama’ata, singadolo 'A sidoa’a 'Ai diri di’a ngowa’a 'U sisengene, la 'O sisalamata 'Ai jama’ata✝5:25 Kol. 3:19; 1Pet. 3:7 26 Kristus 'o 'a’a so’o gena, la Unanga 'a sidadi ngene 'Ai 'umata. Unanga gena-ge ro si’ofi 'Ai jama’ata reo 'Ai do-doto’o re ḇanyo na’o wo sanga baptis. 27 Unanga 'o 'a’a gena-ge, la 'Ai jama’ata nyengara talaḏi ra Unanga 'ai biono sa’olo 'ofi-'ofi kamanga ḏosa ua; ma tero sa’olo mosolese mo madiai ro-rousu mo totoma 'ami tubaie di’a mo molo’ara. 28 So’o gena ḏi’i, nau’u balasu ni dadalara ninga were’a ma tero sa’olo ni dadalara ninga lese masiretene. Unanga ga’a 'a dadalara 'ai were’a, ma duhu gena-ge unanga 'a dadalara 'ai lese masiretene ḏi’i, 29 sababu matengo i’a mai ua 'a emono 'ai diri masiretene! Siḏibo ḏi’i unanga 'a kalesanga re 'a jaga, ma tero sa’olo Kristus 'a palihara re 'A jaga 'Ai jama’ata, 30 sababu ngene wo dadi bageanga-bageanga ra Unanga 'ai lese. 31 Toma Boku 'Ofi-'Ofi 'i silefo so’o ne: "Sababu gena-ge, na-nau’u matengo ḏuanga i’a 'a sisoi’i tala 'ai ḇaḇa re ngina, di’a 'o marimoi tai were’a re ananga nga muḏiḏi raḏi dadi rimoi."✝5:31 Do. 2:24 32 Bu-bula’a gena-ge, enanga ma maksudu lai ngido. Mada’a ngoi ta site-tero sa’olo nau’u re were’a ma tero sa’olo Kristus re 'Ai jama’ata. 33 Kalaha so’o gena, bu-bula’a gena-ge di’a ngini ḏi’i: Nau’u balasu 'o dadalara 'ai were’a ma tero sa’olo unanga 'o dadalara 'ai lese re were’a balasu mo silamo’o 'ami nau’u.