Ma’u riono matengo re matengo
1 Ioronongoḏu ngo-ngaku rimoi, na’o 'age rema ngowa’a matengo i’a ro ngaku Yesus 'o madaga’a ḏosa, ngini ga’a ninga 'ahu Ma Ngagara 'Ofi-'Ofi ya parenta, ngini balasu na’u sinyanyasele ngowa’a gena-ge, la 'o maḏibo toma ngo’omo boloto. Mada’a ngini na si’a’a reninga 'akala re sinyingara mereoso. Re ḏi’i ngini ni ma’istiari, la ngini masiretene ni sanga bo-baja ua di’a madaga’a ḏosa ḏi’i. 2 Wakutu matengo i’a sanga susa, ngini balasu ni ma’u riono. Na’o ni madaga’a so’o gena, ngini ni mete’e Kristus 'ai hukumu. 3 Na’o matengo i’a 'o basono tala unanga lebe la-lamo’o, momongolo ua so’o gena ua, unanga gena-ge 'a sihaga unanga 'ai diri masiretene. 4 Matengo re matengo balasu ma’insafu 'ai diri masiretene: bae 'ai ga’a 'i rousu, bae 'i rousu ua. Na’o 'ai ga’a 'i rousu, kara unanga 'o maroanga. Mada’a awa 'a site-tero 'ai ga’a reo ngowa’a lelegu manga ga’a. 5 Sababu matengo re matengo matara doiti 'ai gina di’a 'ai ga’a masiretene.