3 Mada’a so’o gena-ge ua! Musungu rimoi-musungu rimoi manga jou-jou ya si’elingi ie tau-taunu mangale ananga ngowa’a baraḏosa! 4 Sababu sapi ma ngaunu re 'abingi ma nau’u ma ngaunu 'i singi-ngiranga ngowa’a manga ḏosa yoḏu’u.
5 Sababu gena-ge, wakutu Kristus 'o osama toma dungia, Unanga 'o kanau ra Ma Jou’ongu Madutu so’o ne:
"Baba 'o mau ua jou-jou bolo bu-bula’a.
Siḏibo ḏi’i, Baba ro sidodahe Ngoi 'ari lese 'i dadi jou-jou ga’a Ngoi ḏuanga i’a to sidoa’a ra Baba.
6 Baba 'o nyanyaḏi ua ananga manga jou-jou haiwani ga’a 'aḏi tau’u
bolo jou-jou di’a singi-ngiranga ḏosa.
7 Dadi ngoi to kanau so’o ne: ‘Ngoi nena-ne Ma Jou’ongu Madutu.
Ngoi reto sapolo di’a to siḏagi 'Ani mau,
ma tero sa’olo 'i silefo toma kartasi lo-lolo mangale Ngoi.’ "10:5-7 Nya. 40:7-9
8 Siḏa-siḏa kalaha manga jou-jou mo-moini ga’a 'aḏi pula’a mete’e Musa 'ai hukumu, Kristus 'o kanau ra Ma Jou’ongu Madutu, "Baba 'o nyafusu ua re 'o nyanyaḏi ua manga jou-jou, manga bu-bula’a, manga haiwani tau’u bolo manga bu-bula’a di’a singi-ngiranga manga ḏosa." 9 Gena ḏua, Unanga 'o kanau, "Ngoi nena-ne Ma Jou’ongu Madutu, Ngoi reto sapolo di’a ta siḏagi 'Ani mau." Dadi Ma Jou’ongu Madutu 'a singi-ngiranga 'atoranga ma siḏa mangale jou-jou re bu-bula’a gena-ge, kara 'A singali reo Kristus 'o dadi jou-jou. 10 Yesus Kristus ra siḏagi Ma Jou’ongu Madutu 'ai 'akala ma mau. Dadi pa’i soi moi ḇato Unanga 'a sidoa’a 'Ai lese masiretene sa’olo jou-jou di’a ngene. Sababu gena-ge, Ma Jou’ongu Madutu 'o siwola i’a ngene sa’olo dadi 'Ai ngowa’a 'ofi-'ofi kasingado-ngadolo i’a.