'Ibrani 12

5 Re ni sidaioranga ḏua Ma Jou’ongu Madutu 'ai demo nena-ne ga’a 'i pula’a de-de’e ra ngini sababu ngini 'Ai ngowa-ngowa’a nau’u:

" 'Ari ngowa’a nau’u na totoho la-la ino Ma Jou’ongu Madutu 'ai do-doto’o,

re awa 'ani 'akala re sinyingara 'i rapo’o na’o Tini ḇangata.

6 Sababu Ma Jou’ongu Madutu 'o doto’o toma ngowa’a ga’a Unanga 'o dadalara

re 'O sihukumu 'a guna ḇato ga’a Unanga 'ai ngowa-ngowa’a nau’u."✝12:5-6 Ayb. 5:17; Dol. 3:11-12

7 Dadi, wakutu ngini ni sanga sangisara, balasu ni tahana. Sababu Ma Jou’ongu Madutu 'o pake sangisara di’a 'O doto’o ngini ma tero sa’olo ḇaḇa 'o pake hukumu di’a 'o doto’o 'ai ngowa’a nau’u. Sanga ua, ḇaḇa 'o doto’o 'ai ngowa’a nau’u so’o gena-ge ua. 8 Na’o ngini sanga hukumu ua taninga ḇaḇa toma dungia nena-ne, ngini ngimono madutu ua. So’o gena-ge Ma Jou’ongu Madutu 'o pake sangisara di’a doto’o 'ai ngowa’a nau’u mo-moini. Na’o so’o gena-ge ua, ngene 'Ai ngowa’a nau’u ua, mada’a ngowa’a haram. 9 Sidogo ḏi’i, ngene renanga ḇaḇa toma dungia, unanga na sihukumu di’a doto’o ngene, re dadi ngene wo silamo’o unanga, ma la-lamo’o i’a ḏi’i nanga Ḇaḇa toma soroga! Tantu ḏua ngene lebe wo ta’aloko ra Unanga, la ngene sanga 'ahu kasingado-ngadolo i’a. 10 Nanga ḇaḇa toma dungia nena-ne, ananga 'aḏi sihukumu di’a 'aḏi doto’o ngene toma dungia mete’e 'oru ga’a la-la tamanga fikirana re pa’i ti’ara ua. Mada’a Ma Jou’ongu Madutu 'o pake sangisara di’a doto’o ngene mete’e 'oru ga’a la-la di’a ngene, la wo dadi 'ofi-'ofi mamete’e ra Unanga. 11 Wakutu Ma Jou’ongu Madutu 'o pake sangisara di’a doto’o ngene, nanga 'akala re sinyingara 'i sanangi ua sababu wo basono si-siḏi. Mada’a togumu i’a, ngene wo basono dame tananga 'akala re sinyingara re wo sijumu 'ahu loasa re banari.