Hebreus 8

6 Mada’a nange-ne Yesus 'ai munara lebe mulia reo 'imam-'imam gena-ge manga munara. Sababu Yesus 'o dadi lese to golona di’a jaji ma su-sungi ga’a lebe mulia reo jaji ma siḏa. Re Sababu wakutu Ma Jou’ongu Madutu 'o pula’a jaji ma su-sungi gena-ge, Unanga 'o sijaji 'ori i’a lebe mulia di’a ngene reo 'ori i’a toma jaji ma siḏa.

7 Na’o jaji ma siḏa kama kuranga ua, ma faeda 'oru mau jaji ma su-sungi?! 8 Mada’a Ma Jou’ongu Madutu 'a sanga 'Ai 'umata manga ta-sala singadolo 'O kanau,

" 'Eli-'elingi! Ma 'orasa ḏuanga i’a 'i ngadolo

wakutu Ngoi to 'a’a jaji ma su-sungi toma bangsa Israel

re bangsa Yehuda.

9 Jaji gena-ge ma tero ua sa’olo jaji ma siḏa ga’a Ngoi ta si’a’a ḏua tamanga ete re dotumu

wakutu Ngoi to sisupu ananga toma daeraha Mesir.

Sababu toma 'orasa gena-ge, ananga ya mete’e ua Ngoi 'ari jaji ma siḏa,

dadi ananga Ngoi ta’u siwaro i’a ua.

10 Mada’a jaji nena-ne ga’a Ngoi ḏuanga i’a ta 'a’a toma 'umata Israel toma biono i’a:

Ngoi 'ari hukumu ta sigare tamanga fikirana, re ta silefo tamanga 'akala re sinyingara ma dara.

Ngoi to dadi Ma Jou’ongu Madutu ga’a ananga 'aḏi silamo’o re siḏubuso

re ananga 'aḏi dadi Ngoi 'ari 'umata.

11 Ngowa’a ga’a manga suku ma tero, ananga matengo re matengo ma’u sidoto’o riwara,

bolo ioronongoḏu matengo re matengo ma’u siajele riwara mangale, ‘Ngana balasu no nana’o Ma Jou’ongu Madutu.’

Sababu ananga mo-moini, ce-ceka’a ngadolo la-lamo’o, 'aḏi nana’o Ngoi.

12 Ananga manga sala, Ngoi ḏuanga i’a ta singi-ngiranga

re manga ḏosa-ḏosa, Ngoi ḏuanga i’a ta 'elingi riwara."✝8:8-12 Yer. 31:31-34

13 Sababu Ma Jou’ongu Madutu 'o kanau mangale jaji gena-ge "su-sungi," Unanga ro 'a’a jaji ma siḏa ri pake riwara. Re 'ori i’a ga’a ri siḏa, ti’ara ua 'i iranga.