Yohanes 15

Yesus 'anggur ma lese lamo’o mode-mode’e

1 Yesus 'o kanau, "Ngoi nena-ne 'anggur ma lese lamo’o mode-mode’e, re 'Ari Ḇaḇa Unanga guḏa ma dutu. 2 'Anggur ma umanga mo-moini ra Ngoi ga’a 'i sowo’o ua, wa tola’a. Re ma umanga mo-moini ga’a rema sowo’o, wa silagara, la 'i dadi 'ofi kara ma sowo’o ganapu repe. 3 Ngini reni 'ofi sababu ngini reni dawongo 'Ari do-doto’o. 4 Ngini balasu ni marimoi tau-taunu ra Ngoi, re Ngoi to marimoi ra ngini. Pa’i ma umanga ḇato kama 'anggur ma lese lamo’o ua 'i sowo’o yoḏu’u, enanga balasu 'i marimoi toma 'anggur ma lese lamo’o. So’o gena ḏi’i, ngini nga’unu ni sowo’o pa’i na’o ni marimoi ra Ngoi ḇato.

5 Ngoi nena-ne 'anggur ma lese lamo’o re ngini enanga ma uma-umanga. 'A guna ḇato ga’a marimoi ra Ngoi re Ngoi ḏi’i marimoi ra unanga, 'ai sowo’o 'i repe. Sababu na’o ni marimoi ua ra Ngoi, ngini ni 'a’a 'ori i’a i’a yoḏu’u. 6 Na’o 'a guna ḇato ga’a marimoi ua ra Ngoi, unanga gena-ge ma tero sa’olo 'anggur ma umanga ga’a ri tola’a, kara 'i dadi ngonono. 'Anggur ma umanga gena-ge, ngowa’a ya lomu kara ya upa’a toma u’u re enanga 'i ro’u. 7 Na’o ngini marimoi tau-taunu ra Ngoi re 'Ari do-doto’o ni gogono tau-taunu taninga 'akala re sinyingara ma dara, ni golo’o 'oru ḇato Tari Ḇaḇa, tantu ḏua Unanga nu pula’a ra ngini. 8 Na’o ngini ninga sowo’o lai repe, 'Ari Ḇaḇa ngowa’a 'U silamo’o re ngini mode-mode’e ni dadi 'Ari me-mete’e.