João 4

Didina’o heranga ma soi ḏiḏi: Yesus 'o si-la pagawe kadato 'ai ngowa’a nau’u

46 Gena ḏua, Yesus dadunu 'o maḏibo toma limau Kana, daeraha Galilea, ngi’i ga’a Unanga ro si’a’a ḇanyo 'i dadi 'anggur. 'Age toma limau Kapernaum pagawe kadato matengo 'ai ngowa’a nau’u siḏi lai siḏi.✝4:46 Yoh. 2:1-11 47 Wakutu unanga gena-ge 'o 'isene Yesus ro sapolo toma daeraha Galilea da’a Yudea ino, unanga 'o tagi ra Yesus re 'o maḏigaro’o ra Unanga, la Unanga 'o tagi toma limau Kapernaum di’a si-la 'ai ngowa’a nau’u ga’a sa’i 'o sengene.

48 Yesus 'o kanau i’a toma pagawe kadato gena-ge, "Na’o ngini ni oḏi’i nyangu didina’o heranga re 'ori i’a hera-heranga, ngini ni ngaku ua!"

49 Pagawe kadato gena-ge 'o kanau ra Yesus, "Tuanga, capati no tagi, 'ari ngowa’a nau’u sa’i 'o sengene."

50 Yesus 'o kanau ra unanga, "Tagi ḇato 'ani ngowa’a nau’u ro la." Unanga gena-ge 'o ngaku mode-mode’e Yesus 'ai demo-demo, dadi 'o tagi maḏibo.

51 Toma ḏo-ḏagi ma dara moju, pagawe kadato gena-ge 'ai falalomu-falalomu 'aḏi sapolo ma’u sanga ra unanga re 'aḏi siajele ra unanga mangale 'ai ngowa’a nau’u ga’a 'o siḏi ro la.

52 Ḏua unanga 'o sano tai falalomu-falalomu gena-ge, ca’olo muḏuo 'ari ngowa’a nau’u ro la. Ananga ya sangoro, " 'Au nyigo wangere 'olona ḏa ca’olo rimoi, 'ai gagama ri iranga." 53 Ḏua unanga, ma ḇaḇa 'a si’elingi ie, 'au nyigo toma 'orasa ḏa ca’olo rimoi, Yesus 'o kanau ra unanga, " 'Ani ngowa’a ro la." Dadi mulaingi 'orasa gena-ge re si’a, unanga re 'ai ngitu re ngale, ananga mo-moini 'aḏi ngaku Yesus.

54 Gena-ge didina’o heranga ma soi ḏiḏi ga’a Yesus 'a si’a’a toma daeraha Galilea wakutu Unanga 'o maḏibo da’a daeraha Yudea ino.