Lukas 8

Yairus 'ai ngowa were’a mo dadunu 'ahu moju, re we-were’a matengo mo siḏi 'ami ngaunu 'i pa’ala mo la

40 Wakutu Yesus 'o maḏibo da’a kaci moi toma talaga ma 'uḏu, ngowa’a repe 'aḏi dawongo Unanga remanga roanga sababu 'aḏi totoma tau-taunu Unanga. 41 Ḏua sapolo ḏi’i matengo 'ai lomanga 'a Yairus. Unanga gena-ge 'o dadi wala puji ma sae’e. Unanga 'o maḏipolono ra Yesus re 'o maḏigaro’o na’o nyengara gari’a Yesus no sapolo ra ngoi 'ari wala. 42 Sababu 'ari ngowa’a were’a pa’i munanga matengo 'ami 'umuru musungu nyagi moi re romoḏiḏi sa’i mo sengene. Wakutu Yesus 'o tagi ra Yairus 'ai wala, ngowa’a repe masala 'u gowolo Unanga toma biono re ḏuḏunu, kuwiḏa re kuḇali singadolo ananga ma’u tu-tuḏu.

43 Toma ngowa’a repe manga sigolona, 'age rema we-were’a matengo mo siḏi 'ami ngaunu 'i pa’ala ma di’ara musungu nyagi moi re romoḏiḏi. Re 'ami 'ori i’a rana mai mawu’unu rema moini di’a 'ami sou’u ma bo-bangu toma dotere.*8:43 'Age toma kartasi lo-lolo lelegu nena-ne 'i cua:Re 'ami 'ori i’a rana mai mawu’unu rema moini di’a 'ami sou’u ma bo-bangu toma dotere. Mada’a matengo i’a mai ua nga’unu si-la munanga. 44 We-were’a gena-ge mo masebanga i’a ra Yesus 'ai ḏuḏunu, kara ma cigi 'a Yesus 'ai juba ma dere. Toma 'orasa gena-ge ḏua 'ami ngaunu 'i pa’ala riwara. 45 Yesus 'o sano, " 'A guna 'o cigi Ngoi?" Ananga mo-moini 'aḏi masoloto. Ḏua Petrus 'o kanau, "Tuanga, ngowa’a manga repe masala 'aḏi sigoloḏi, re ma’u tutuḏu."

46 Yesus 'o kanau, "Mada’a 'age rema ngowa’a matengo 'o cigi ngoi. Ngoi ta waro, sababu Ngoi 'ari de-de’e 'i supu." 47 We-were’a gena-ge mo ma’insafu mangale mi ga’a nange-ge ngowa’a ya waro. Dadi munanga mo sapolo rami terewete, re mo maḏipolono ra Yesus. Ḏua munanga mo masijarita toma mandan, i’a sa’olo munanga mo cigi 'a Yesus 'ai juba re 'orasa gena-ge ḏua 'ami si-siḏi ri la. 48 Yesus 'o kanau ra munanga, " 'Ari ngowa’a, sababu ngana no ngaku Ngoi, ngana reno la, no tagi rani dame."

49 Wakutu Yesus 'o ka-kanau moju, 'a Yairus 'ai so-soma’a matengo 'o sapolo da’a ra Yairus 'ai wala ino. Unanga 'o kanau ra Yairus, "Tuanga 'ani ngowa’a were’a remo sengene, no sikangela Guru rawara."

50 Yesus 'a 'isene i’a so’o gena, kara Unanga 'o kanau ra Yairus, "Mojongo awa, ngaku ḇato ḏuanga i’a 'ani ngowa’a mo la."

51 Wakutu ananga 'aḏi ngadolo ra Yairus 'ai wala, Yesus 'o simaha ua ananga matengo i’a 'aḏi osama mamete’e ra Unanga, ḏuga-ḏuga Petrus, Yohanes, Yakobus, re ngowa’a ga’a mo siḏi 'ami ḇaḇa rami ngina. 52 Ngowa’a mo-moini ya rerese ma gaḏi, sababu ngowa 'olo were’a gena-ge remo sengene. Mada’a Yesus 'o kanau, "Ni 'aḏi awa, munanga mo sengene ua, mada’a munanga pa’i mo otu ḇato!" (Yesus 'o waro ḏua ngowa 'olo were’a gena-ge remo sengene.)

53 Ananga 'aḏi nye-nyelo’o 'a Yesus, sababu ananga 'aḏi waro ngowa 'olo were’a gena-ge remo sengene. 54 Togumu i’a, Yesus 'a gu’u ngowa 'olo were’a gena-ge 'ami giama re 'o kanau, "Ngowa 'olo, no momi’i." 55 'Ami nyawa ri ḏibo re mo momi’i. Togumu i’a Yesus 'o soma’a ananga 'aḏi pula’a munanga mo oromo. 56 Ngowa 'olo were’a 'ami ḇaḇa re 'ami ngina 'aḏi heranga masala. Mada’a Yesus 'o simaha ua ananga 'aḏi sihabari 'oru 'i dadi gena-ge ra guna ḇato.