Mateus 14

Yesus 'o pula’a oromo ngowa’a nga cala romotoa

13 Wakutu Yesus 'a 'isene habari gena-ge, Unanga masiretene 'o mabalene toma oti di’a sisoi’i tala re 'o tagi disa ngi’i ga-garura. Mada’a wakutu ngowa’a kawasa ya 'isene Yesus ro tagi, ananga ya sisoi’i tala manga limau re 'aḏi siduu’u Unanga sitola’a ma ji’o mete’e tana’a dudungu. 14 Wakutu Yesus 'o 'uci toma oti ino re 'O oḏi’i ngowa’a repe, Tai 'akala re sinyingara 'i baolo dadalara ra ananga. Dadi Unanga 'o si-la ngowa-ngowa’a siḏi toma ngowa’a repe manga sigolona.

15 Ma 'orasa wangere so’o ne’o ḏua, Yesus 'ai me-mete’e 'aḏi sapolo ra Unanga re 'aḏi kanau, "Sa’i ri lobi’i re ngi’i ne 'i tiwongo i’a. Jobilaha Jou no soma’a ngowa’a repe nena-ne 'aḏi maḏibo, la 'aḏi tibo manga ngo-ngoromo toma gamu ga’a co-cori ngi’i nena-ne."

16 Yesus 'o sangoro, "Ngini nena-ne balasu pula’a ngo-ngoromo ra ananga. Awa simaha ananga 'aḏi maḏibo remanga sawini."

17 Yesus 'ai me-mete’e 'aḏi kanau, "Ngomi minga dodahe pa’i roti ngai romotoa re nyao’o ngai ḏiḏi!"

18 Yesus 'o kanau, "Gasa gena-ge ino!" 19 Gena ḏua, Yesus 'o soma’a ngowa’a repe gena-ge 'aḏi tegoro toma rurubu ma re’u. Re Unanga 'o 'oro roti ngai romotoa re ma nyao’o ngai ḏiḏi 'O talaḏi ie da’u diwanga re 'O sibere ie murasa ma la ra Ma Jou’ongu Madutu. Togumu gena, Unanga 'A poti-poti roti re 'A sipula’a Tai me-mete’e, kara ananga ya sibalangu toma ngowa’a repe gena-ge. 20 Ananga mo-moini 'aḏi oromo singadolo 'aḏi wunusu. Togumu i’a, Yesus 'ai me-mete’e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga. 21 Toma 'orasa gena-ge, ngowa’a repe ga’a 'aḏi oromo na-nau’u ḇato ḏa nga cala romotoa, gena-ge siroimi ua we-were’a re ngowa 'olo.