Matius 16

Ngowa-ngowa’a Farisi re Saduki manga do-doto’o 'i site-tero sa’olo ragi

5 Wakutu Yesus rai me-mete’e 'aḏi ngadolo da’a talaga kaci moi, 'Ai me-mete’e aro ya waro mangale ananga 'aḏi gasa roti ua. 6 Yesus 'o kanau ra ananga, "Ni ma’istiari ino toma ngowa-ngowa’a Farisi re Saduki manga ragi."✝16:6 Luk. 12:1

7 Wakutu ananga gena-ge 'aḏi 'isene Yesus 'o kanau so’o gena, 'Ai me-mete’e 'aḏi makanau matengo re matengo, "Unanga 'o kanau so’o gena, sababu ngene wo gasa roti ua."

8 Yesus 'a waro 'oru ga’a ananga 'aḏi ma’u kanau matengo re matengo. Dadi Unanga 'o kanau i’a ra ananga, "I’a sa’olo ngini ni ma’u kanau matengo re matengo mangale roti 'i cua?! Ngini ninga ngo-ngaku pa’i ceka’a ua ra Ngoi?! 9 Ngini ni sahe nyangu moju! Ngini ni 'elingi bolo ua mangale 'o roti ngai romotoa ga’a Ngoi ta poti-poti di’a ngowa’a nga cala romotoa re ma bai’i pipigu muḏuo ga’a ngini na lomu?!✝16:9 Mat. 14:17-21 10 Re sa’olo ḏi’i, roti ngai tumudingi, di’a ngowa’a nga cala rata re ma bai’i pipigu muḏuo ga’a ngini na lomu?!✝16:10 Mat. 15:34-38 11 I’a sa’olo ngini na sahe nyangu moju Ngoi to kanau ra ngini gena-ge mangale 'o roti ua. Ma’istiari toma ngowa-ngowa’a Farisi re Saduki manga ragi!"

12 Togumu i’a, Yesus 'ai me-mete’e ya sahe mangale Yesus soma’a ua ananga 'aḏi ma’istiari toma ragi ga’a sipake toma roti, mada’a ananga 'aḏi ma’istiari toma ngowa-ngowa’a Farisi re Saduki manga do-doto’o.