Mateus 17

'U simulia Yesus

1 Wangere rarama palisi’i i’a Yesus 'o gasa 'a Petrus, 'a Yakobus re 'a Yohanes, ananga nga muḏiḏi gena-ge gia nongoḏu. Ananga 'aḏi masai’i re mabere ie toma kie kau’u rimoi re toma ngi’i gena-ge ngowa’a lelegu cua, pa’i ananga ḇato. 2 Yesus 'ai rupa 'i ngali ra ananga nga ḏu’ange manga biono: 'Ai biono ma tarangi ma tero wangere ma la’o, re 'Ai pakeanga 'i dadi buḏo jama-jamanga. 3 Gena ḏua, Yesus 'ai me-mete’e nga ḏu’ange, ananga 'aḏi oḏi’i 'a Musa re 'a Elia, 'aḏi makanau ra Yesus. 4 Petrus 'o kanau i’a ra Yesus, "Ma Jou, rousu madutu ngene 'ane-ne. Na’o Ma Jou no nyanyaḏi, ngoi to side’oso suyu’u ḏu ro’ange toma ngi’i nena-ne: ḏu moi di’a Ma Jou, ḏu moi di’a Musa re ḏu moi ḏi’i di’a Elia."

5 Wakutu 'a Petrus 'o ka-kanau moju, kakamo lai tarangi ya’u sao ananga re toma kakamo gena-ge ma dara 'aḏi 'isene iḏingi ma betongo so’o ne: "Unanga nena-ne 'Ari Ngowa’a Nau’u ga’a Tu dadalara, Ngoi 'ari 'akala re sinyingara ma sanangi Ta sipa’ala ra Unanga. Ni 'isene Unanga!"✝17:1-5 2Pet. 1:17-18 ✝17:5 Do. 22:2; Nya. 2:7; Yes. 42:1; Mat. 3:17, 12:18; Mrk. 1:11; Luk. 3:22; Dad. 18:15