Mateus 18

'Ade-'ade mangale budaka matengo 'o si’apongo ua 'ai ḏagilomu budaka

21 Gena ḏua, Petrus 'o sapolo ra Yesus re 'o sano, "Ma Jou, na’o 'ari ioronongoḏu 'a’a ḏosa ra ngoi, singadolo soi muḏuo ngoi balasu to si’apongo unanga? Singadolo soi tumudingi?"

22 Yesus 'a sangoro, "Ngoi to kanau ra ngana, pa’i soi tumudingi ḇato ua, mada’a balasu si’apongo unanga soi nyagi tumudingi sidu’o soi tumudingi!*18:22 'Age toma kartasi lo-lolo lelegu 'i silefo so’o ne: si’apongo unanga soi nyagi tumudingi re tumudingi! *18:22 Yesus 'ai maksudu so’o ne: Ngene balasu wo si’apongo ngowa’a kama bati ua!✝18:21-22 Luk. 17:3-4 23 Sababu Soroga ma Pareta ma tero sa’olo 'ade-'ade so’o ne: 'Olana matengo mau 'ai budaka-budaka 'aḏi fangu manga banyatoro. 24 Siḏa-siḏa budaka matengo ga’a 'ai banyatoro rema juta-juta, ananga 'u sitalaḏi ra 'olana gena-ge. 25 Mada’a unanga 'a fangu 'a simoini 'a nga’unu ua. Dadi 'olana 'o parenta ngowa’a 'aḏi wu’unu budaka gena-ge, re 'ai ngowa’a re were’a, re 'ori i’a rana mo-moini, la sifangu 'ai banyatoro.

26 Budaka gena-ge 'o maḏipolono ra 'olana 'ai biono re madigaro’o, ‘Tuanga no sijumu 'ani 'akala ḇanyo ra ngoi, re maha ḏuanga i’a ngoi ta fangu ta simoini.’ 27 Dadi 'olana 'ai 'akala re sinyingara 'i baolo dadalara tai budaka gena-ge, singadolo budaka gena-ge 'ai banyatoro ma 'olana 'a singi-ngiranga re sibebasa unanga di’a 'o tagi maḏibo.

28 Mada’a wakutu budaka gena-ge 'o supu, unanga ma’u sanga 'ai ḏagilomu budaka matengo ga’a 'ai banyatoro cala muḏuo i’a ra unanga. Ḏua unanga 'u cako’o re 'u colokoko re 'o kanau, ‘Na fangu simoini 'ani banyatoro!’

29 Ḏua 'ai ḏagilomu gena-ge 'o mapagara 'ai biono tala re maḏigaro’o ra unanga, ‘Wolo, no sijumu 'ani 'akala ḇanyo ra ngoi, re maha ḏuanga i’a ngoi ta fangu ta simoini!’

30 Mada’a unanga 'a itomo. Siḏibo ḏi’i, unanga 'u singosama 'ai ḏagilomu budaka toma bui, singadolo 'ai banyatoro 'a fangu simoini. 31 Wakutu budaka-budaka ma lelegu ananga ya oḏi’i i’a gena-ge, ananga manga 'akala re sinyingara 'i kangela. Dadi ananga 'aḏi siajele mangale gena-ge ra 'olana. 32 Ḏua 'olana gena-ge 'o 'aro’o budaka ga’a 'ai 'akala re sinyingara ma jira re 'o kanau i’a ra unanga, ‘Budaka ma jira! Ngana 'ani banyatoro ngoi ta singi-ngiranga mo-moini, pa’i sababu no maḏigaro’o ḇato ra ngoi. 33 I’a sa’olo, ngana no sijumu ua 'ani 'akala re sinyingara ma la-la tani ḏagilomu budaka, ma tero sa’olo ngoi reto sijumu 'ari 'akala re sinyingara ma la-la ra ngana?’

34 Dadi 'olana 'o ruta masala toma budaka gena-ge ga’a 'ai 'akala re sinyingara 'i cira re 'u singosama unanga toma bui, singadolo 'a fangu 'ai banyatoro simoini."

35 Yesus 'a siḏo-ḏogumu 'ai 'aḏe-'aḏe gena-ge so’o ne: "So’o gena ḏi’i, 'Ari Ḇaḇa da’u toma soroga ḏuanga i’a nu 'a’a ngini matengo re matengo, na’o ngini ni si’apongo ua taninga 'akala re sinyingara ninga ioronongoḏu ga’a 'a’a ḏosa ra ngini."