Mateus 20

'Ade-'ade mangale ngowa-ngowa’a munara toma guḏa 'anggur

1 "Wakutu Soroga ma Pareta*20:1 Soroga ma Pareta ma tero Ma Jou’ongu Madutu 'ai Pareta. 'i ngadolo, enanga gena-ge ma tero sa’olo 'ade-'ade nena-ne: Da-daini i’a moju guḏa 'anggur ma dutu matengo 'o tagi 'o disa ngowa’a di’a 'aḏi munara tai guḏa 'anggur. 2 Unanga 'a si’aturu ananga manga ngogele wange moi pipisi salaka ngai moi. Togumu i’a 'o soma’a ananga 'aḏi munara tai guḏa 'anggur gena-ge. 3 Ca’olo siworo da-daini i’a, guḏa 'anggur ma dutu gena-ge dadunu 'o tagi ḏi’i, re 'o oḏi’i ngowa’a nga muḏuo i’a pa’i 'aḏi maro-roka ḇato toma pasara. 4 Ḏua unanga 'o kanau i’a toma ngowa-ngowa’a gena-ge, ‘Tagi ni munara ra ngoi 'ari guḏa 'anggur. Ngoi ḏuanga i’a tini fangu ninga munara ma ijana ga’a ngoi reta putusu 'i 'adili.’ 5 Gena ḏua, ananga 'aḏi tagi munara,

Ca’olo nyagi moi re romoḏiḏi wange 'olona tala, re wange so’o ne’o ca’olo ro’ange, guḏa 'anggur ma dutu gena-ge dadunu 'o tagi di’a 'o sewa ngowa’a munara. 6 Re ḏa ca’olo romotoa wangere so’o ne’o, unanga gena-ge dadunu 'o tagi, re 'o oḏi’i rema ngowa’a moju pa’i 'aḏi maro-roka ḇato. Unanga ya’u sano i’a ra ananga, ‘I’a sa’olo toma wange moi ma dara, ngini ni maga’a 'oru rimoi i’a mai ua?’

7 Ngowa-ngowa’a gena-ge 'aḏi sangoro, ‘Ngowa’a 'aḏi sipula’a munara ngomi ua.’

Dadi guḏa 'anggur ma dutu gena-ge 'o kanau, ‘Na’o so’o gena, ngini tagi re ni munara ra ngoi 'ari guḏa 'anggur.’ Dadi ananga gena-ge tagi munara.

8 Wakutu wangere so’o ne’o ḏa ca’olo rarama, guḏa 'anggur ma dutu 'o kanau tai ngowa’a munara ma sae’e, ‘ 'Aro’o re lomu ngowa’a munara mo-moini, la ta fangu ananga matengo re matengo manga munara ma ngogele; mulaingi toma ngowa’a munara ga’a sapolo ma siḏo-ḏogumu singadolo ngowa’a munara ga’a 'aḏi sapolo ma mulaingi.’✝20:8 'Im. 19:13; Dad. 24:15

9 Ngowa’a munara ga’a 'aḏi osama munara ca’olo romotoa wange so’o ne’o, ananga gena-ge matai sapolo. Ananga matengo re matengo 'aḏi sanga pipisi salaka ngai moi. 10 Gena ḏua, sapolo ḏi’i ngowa’a munara ga’a 'aḏi osama munara da-daini i’a moju. Ananga 'aḏi mafikiri ananga 'aḏi sanga pipisi lai lamo’o. Momongolo ua, ananga matengo re matengo mai 'aḏi sanga pipisi salaka ngai moi. 11 Wakutu ananga 'aḏi sanga manga pipisi gena-ge, ananga 'aḏi kuḏubungu toma guḏa 'anggur ma dutu re 'aḏi kanau, 12 ‘Ananga ga’a osama munara ma siḏo-ḏogumu pa’i 'aḏi munara jam rimoi. Ngomi mi munara wange moi ma dara, re sidogo wangere ya 'erese ngomi singadolo wangere so’o ne’o, mada’a ngana no fangu minga munara ma tero sa’olo ananga gena-ge manga munara!’

13 Guḏa 'anggur ma dutu gena-ge 'a sangoro ra matengo tamanga sigolona, ‘Wolo, ngoi kai ri sala ua ra ngana. Ngana re ngoi, 'oru ngene wo nyengara ḏua: No munara wange moi, no sanga pipisi salaka ngai moi? 14 Dadi na 'oro 'ani pipisi kara no tagi. Ngoi mau to pula’a ngowa’a munara ga’a 'aḏi sapolo ma siḏo-ḏogumu manga pipisi ma lamo’o ma tero sa’olo ta ngana ḏi’i. 15 Ngoi nyengara bolo ua to pula’a 'ari pipisi ra guna ḇato mete’e 'ari mau?! I’a sa’olo ngana 'ani 'akala re sinyingara 'i go-goḏi? 'Oru sababu 'ari 'akala re sinyingara lai mura?’ "

16 "Dadi, ngowa’a ga’a ngowa’a mapake ua, ḏuanga i’a 'aḏi dadi ngowa’a la-lamo’o. Re ngowa’a ga’a ngowa’a la-lamo’o, ḏuanga i’a 'aḏi dadi ngowa’a mapake ua."✝20:16 Mat. 19:30; Mrk. 10:31; Luk. 13:30