Mateus 4

Yesus sanga bo-baja toma 'Iblisi

1 Togumu i’a, Ma Ngagara 'Ofi-'Ofi 'u gasa Yesus toma daeraha baulaco, la Unanga nyengara sanga bo-baja toma 'Iblisi.✝4:1 'Ibr. 2:18, 4:15 2 Wange nyagi rata re utu nyagi rata Yesus kama oromo ua, dadi Unanga 'o basono sawini. 3 'Iblisi 'i sapolo re 'i kanau ra Unanga, "Ngana nena-ne Ma Jou’ongu Madutu 'ai Ngowa’a Nau’u. Dadi no soma’a maḏi nena-ne 'i dadi roti."

4 Yesus 'a sangoro, "Toma Boku 'Ofi-'Ofi 'i silefo so’o ne: ‘Manusia wo 'ahu pa’i wo oromo roti ḇato ua, mada’a wo 'ahu ḏi’i, sababu wo mete’e Ma Jou’ongu Madutu 'ai demo-demo mo-moini, ga’a Unanga ro kanau.’ "✝4:4 Dad. 8:3

5 Ḏua 'Iblisi 'i gasa Yesus toma limau 'ofi-'ofi Yerusalem, re 'U side’oso Unanga ra Ma Jou’ongu Madutu 'ai Wala ma wanata. 6 Gena ḏua, 'Iblisi gena-ge 'i kanau ra Unanga, "Ngana nena-ne Ma Jou’ongu Madutu 'ai Ngowa’a Nau’u. Dadi No masipoini tala. Sababu toma Boku 'Ofi-'Ofi 'i silefo so’o ne:

‘Ma Jou’ongu Madutu ḏuanga i’a 'o soma’a 'Ai mala’ekata-mala’ekata 'aḏi jaga Ngana la-la.

Re ḏi’i ananga 'aḏi 'alo Ngana,

la 'Ani rou 'i nga’unu toma maḏi awa.’ "✝4:6 Nya. 91:11-12

7 Yesus 'a sangoro, "Mada’a ḏi’i toma Boku 'Ofi-'Ofi ma dara 'i silefo so’o ne: ‘Awa no tai’i Ma Jou’ongu Madutu, 'ani Jou.’ "✝4:7 Dad. 6:16

8 Gena ḏua, 'Iblisi 'i gasa Yesus moju toma kie rimoi lai kau’u ma tubu re 'i sijumu ra Unanga dungia ma pareta mo-moini re pareta-pareta gena-ge ma kabasarana. 9 Re 'i kanau ra Unanga, "Mo-moini nena-ne to pula’a di’a Ngana, na’o Ngana no maḏipolono re No silamo’o re siḏubuso ngoi."

10 Yesus 'a sangoro, " 'Iblisi no sisoi’i tala ngoi. Toma Boku 'Ofi-'Ofi ma dara 'i silefo so’o ne:

‘Silamo’o re siḏubuso Ma Jou’ongu Madutu, 'ani Jou

re de-de’oso pa’i Unanga ḇato.’ "✝4:10 Dad. 6:13

11 Togumu i’a, 'Iblisi 'i sisoi’i tala 'a Yesus, re mala’ekata-mala’ekata 'aḏi sapolo di’a de-de’oso Unanga.