Romanos 1

22 Kalaha ananga gena-ge 'aḏi magoro ino 'aḏi pahe, momongolo ua 'aḏi haga! 23 Ananga 'aḏi oḏu’u silamo’o re siḏubuso Ma Jou’ongu Madutu ga’a 'ahu kasingado-ngadolo i’a. Siḏibo ḏi’i ananga gena-ge 'aḏi silamo’o re siḏubuso jou’ongu ma somoara ga’a 'i matuhu sa’olo manusia ga’a 'i sengene nyengara, re 'aḏi silamo’o re siḏubuso jou’ongu ma somoara ga’a 'i matuhu sa’olo namo toma diwanga, haiwani ma rou rata, re haiwani tare-tare toma tana’a ma re’u.✝1:23 Dad. 4:16-18

24 Sababu gena-ge, Ma Jou’ongu Madutu 'o sieanga i’a ananga, la manga 'akala re sinyingara ma nyafusu 'i kuasa ananga, di’a si’a’a 'ori i’a ma jira singadolo 'aḏi madaga’a 'ori i’a ma faja matengo re matengo. 25 Ananga gena-ge 'aḏi dawongo ua do-doto’o banari mangale Ma Jou’ongu Madutu, mada’a 'aḏi ngaku do-doto’o banari ua; dadi ananga 'aḏi silamo’o re siḏubuso re 'aḏi de-de’oso Ma Jou’ongu Madutu 'ai do-dadi. Mada’a Unanga gena-ge, 'O do-dadi ma cimi, ananga ya silamo’o re siḏubuso ua re ya de-de’oso ua! Unanga gena-ge ga’a 'o patasa di’a sanga puji re silamo’o kasingado-ngadolo i’a. 'Amin.

26 Sababu manusia manga ga’a so’o gena, Ma Jou’ongu Madutu 'o sieanga i’a ananga di’a mete’e manga nyafusu ma jira. Dadi we-were’a manga 'akala ma nyafusu riwara toma na-nau’u sa’olo biasa di’a manusia, mada’a manga 'akala ma nyafusu toma we-were’a lelegu. 27 So’o gena ḏi’i, na-nau’u manga 'akala ma nyafusu riwara toma we-were’a sa’olo biasa di’a manusia. Mada’a ananga gena-ge manga 'akala ma nyafusu pa’i toma na-nau’u lelegu ḇato. Na-nau’u 'aḏi madaga’a 'ori i’a reo na-nau’u lelegu ga’a 'i pula’a mara’a ananga, singadolo 'aḏi sanga enanga ma balasa mete’e manga ga’a ma jira.