12 Sababu gena-ge, awa ni simaha ḏosa di’a 'i kuasa moju taninga lese ga’a ḏuanga i’a 'i sengene, dadi ngini ni mete’e awa ninga nyafusu ma jira moju. 13 Awa ni sidoa’a moju ninga lese ma bageanga rimoi i’a toma ḏosa ma kuasa, di’a 'i 'a’a 'ori i’a ma jira. Mada’a siḏibo ḏi’i, ngini balasu ni sidoa’a ninga 'ahu ra Ma Jou’ongu Madutu sa’olo ngowa’a ga’a raḏi bebasa toma sengene re raḏi sanga 'ahu su-sungi. Ni sidoa’a ninga lese ma bageanga mo-moini ra Ma Jou’ongu Madutu, la Unanga nu pake di’a 'a’a 'ori i’a ga’a loasa re banari, 14 sababu ḏosa 'i kuasa ngini riwara. Dadi ngini ni 'ahu mete’e Ma Jou’ongu Madutu 'ai mura re dadalara, ngini ni 'ahu mete’e Musa 'ai hukumu riwara.

15 Na’o so’o gena-ge, 'oru ngene nyengara wo 'ahu 'a’a ḏosa moju sababu wo 'ahu mete’e Musa 'ai hukumu riwara, mada’a rewo 'ahu mete’e Ma Jou’ongu Madutu 'ai mura re dadalara?! Sanga ua! 16 Tantu ḏua ngini reni waro nena-ne: Na’o ngini ni sidoa’a ninga diri ra matengo i’a di’a mete’e ngowa’a gena-ge 'ai mau, ngini reni dadi unanga 'ai budaka: bae budaka toma ḏosa ga’a sigasa toma sengene kasingado-ngadolo i’a, bae budaka ra Ma Jou’ongu Madutu ga’a si’a’a ngini ngowa’a loasa re banari. 17 Mada’a ino ngene wo sibere ie murasa ma la ra Ma Jou’ongu Madutu, sababu ma siḏa ngini ngowa’a budaka toma ḏosa mada’a nange-ne ngini ni mete’e reninga 'akala re sinyingara mode-mode’e do-doto’o banari ga’a 'i sipula’a ḏua ra ngini. 18 Ngini reni bebasa ḏua toma ḏosa ma kuasa, re nange-ne ni dadi Ma Jou’ongu Madutu 'ai budaka di’a 'a’a ga’a loasa re banari.