2 Sanga ua! Sababu ḏosa 'i kuasa ngene riwara. Dadi i’a sa’olo ngene wo 'ahu 'a’a ḏosa tau-taunu?! 3 Tantu ḏua ngini reni waro nena-ne: Ngene mo-moini ga’a wo sanga baptis, ngene sirimoi ra Kristus Yesus. Dadi gena-ge ma tero sa’olo ngene rewo sengene marimoi ra Unanga. 4 Sababu gena-ge, wakutu ngene wo sanga ḇanyo, 'i ma tero sa’olo ngene siotomo marimoi ra Kristus, la ma tero sa’olo Kristus 'o dadunu 'ahu moju Tai sengene sababu 'Ai Ḇaḇa ma kuasa ga’a mulia, so’o gena ḏi’i ngene wo sanga 'ahu su-sungi.✝6:4 Kol. 2:12

5 Dadi na’o ngene rewo marimoi ra Yesus re Unanga 'ai se-sengene, tantu ḏua, ngene ḏi’i dadunu wo si’ahu moju ma tero Unanga. 6 Ngene rewa waro nanga tabeata baraḏosa ma siḏa ri sengene mamete’e ra Kristus toma salib, la ḏosa ma kuasa ri wejere singadolo ngene ngowa’a budaka toma ḏosa riwara. 7 Sababu na’o matengo i’a ro sengene, unanga gena-ge ro bebasa toma ḏosa ma kuasa.