11 Ma Jou’ongu Madutu ro pake Ma Ngagara 'Ofi-'Ofi di’a dadunu 'O si’ahu Kristus moju toma ngowa’a senge-sengene manga sigolona. Dadi sababu Ma Ngagara 'Ofi-'Ofi 'age taninga 'akala re sinyingara, tantu ḏua Ma Jou’ongu Madutu ḏuanga i’a 'O si’ahu ngini moju. Kalaha ninga lese ḏuanga i’a 'i sengene, Unanga 'a siḏagi so’o gena-ge 'a pake Ma Ngagara 'Ofi-'Ofi ga’a 'age taninga 'akala re sinyingara.8:11 1Kor. 3:16
12 Sababu gena-ge ioronongoḏu ngo-ngaku rimoi, ngene nanga banyatoro so’o ne: Awa ngene wo 'ahu mete’e manusia ma tabeata baraḏosa, mada’a ngene balasu wo 'ahu mete’e Ma Ngagara 'Ofi-'Ofi ma mau. 13 Sababu na’o ngini 'ahu mete’e manusia ma tabeata baraḏosa, tantu ḏua ḏuanga i’a ngini ni sengene kasingado-ngadolo i’a. Mada’a na’o Ma Ngagara 'Ofi-'Ofi 'i sinyanyasele ninga 'ahu, ngini nga’unu ni 'ahu mete’e riwara manusia ma tabeata baraḏosa re ḏuanga i’a ni sanga 'ahu kasingado-ngadolo i’a. 14 Sababu ngowa-ngowa’a ga’a Ma Ngagara 'Ofi-'Ofi ya’u sinyanyasele, ananga gena-ge Ma Jou’ongu Madutu 'ai ngowa-ngowa’a nau’u. 15 Sababu Ma Ngagara 'Ofi-'Ofi ga’a Ma Jou’ongu Madutu 'a pula’a ra ngini, si’a’a ua ngini ni dadi ngowa’a budaka, singadolo ngini ni 'ahu mojongo ma hukumu ra Ma Jou’ongu Madutu. Siḏibo ḏi’i, Ma Ngagara 'Ofi-'Ofi 'i si’a’a ngini dadi Unanga 'ai ngowa-ngowa’a nau’u. Re sababu Ma Ngagara 'Ofi-'Ofi ma kuasa, ngene nga’unu wo 'aro’o Ma Jou’ongu Madutu, "Baba, ngene nanga Ḇaḇa."8:15 Mrk. 14:36; Gal. 4:6 16 Ma Ngagara 'Ofi-'Ofi masiretene 'i sisakisi mamete’e ra ngene nanga roh, mangale ngene Ma Jou’ongu Madutu 'ai ngowa-ngowa’a. 17 Re sababu ngene Unanga 'ai ngowa-ngowa’a, tantu ḏua ḏuanga i’a ngene wo sanga warisi ga’a Unanga 'o sidodahe di’a 'Ai ngowa-ngowa’a. Re ngene ḏuanga i’a sanga warisi gena-ge mamete’e ra Kristus. Sababu toma dungia nena-ne ngene wo sanga sikisa ma tero sa’olo Kristus, dadi ḏuanga i’a ngene wo sanga 'Ai mulia ma balangu ḏi’i.8:15-17 Gal. 4:5-7