19 'Oru ḇato Ma Jou’ongu Madutu 'ai do-dadi toma dungia nena-ne ma dara, enanga mo-moini 'i totoma re 'i ga-ganutu madutu di’a Unanga 'o sijumu 'Ai ngowa-ngowa’a nau’u. 20 Sababu dungia re ma dara mo-moini ri sanga katula, dadi mo-moini gena-ge ma faeda ri cua. Gena-ge 'i dadi mete’e enanga ma mau ua, mada’a mete’e Ma Jou’ongu Madutu masiretene 'Ai 'akala ma mau, Unanga ga’a 'o sisasi dungia nena-ne. Kalaha so’o gena, enanga ḏi’i rema ngo-nganono so’o ne:8:20 Do. 3:17-19 21 Mangale 'orasa ḏuanga i’a 'i ngadolo, wakutu Ma Jou’ongu Madutu 'o sibebasa dungia re ma dara mo-moini toma kuasa hafu-hafu ga’a ya siwejere enanga. Dadi toma 'orasa gena-ge, dungia re ma dara mo-moini 'i 'ahu bebasa re 'i basono 'Ai mulia mamete’e reo Ma Jou’ongu Madutu 'ai ngowa-ngowa’a.
22 Ngene wo waro singadolo 'orasa nange-ne dungia re ma dara mo-moini 'i balisa, sababu enanga 'i basono sangisara ma tero sa’olo were’a rami lese mo basono sangisara wakutu mo maḏe-ḏegoro i’a. 23 Re pa’i dungia re ma dara mo-moini ḇato ua, mada’a ngene masiretene ḏi’i wo balisa tananga 'akala re sinyingara ma dara. Ngene ga’a rewo dawongo Ma Ngagara 'Ofi-'Ofi sa’olo bu-bula’a ma jomolo ga’a Ma Jou’ongu Madutu 'o pula’a ra ngene. Mada’a kalaha so’o gena, ngene wo totoma moju Ma Jou’ongu Madutu 'o sitede ngene di’a wo dadi 'Ai ngowa-ngowa’a nau’u re Unanga 'o sibebasa ngene mo-moini nanga 'ahu toma jira.8:23 2Kor. 5:2-4 24 Siḏa-siḏa wakutu ngene rewo salamata, ngene wo masinganono di’a dawongo mo-moini gena-ge. Mada’a na’o ngene rewa dawongo mo-moini gena-ge, tantu ḏua ngene wo masinganono riwara. Sababu matengo i’a mai ua 'o masinganono moju di’a 'oru ga’a ra sanga ḏua! 25 Mada’a 'oru ga’a ngene wo masinganono moju, ngene wa totoma renanga 'akala ḇanyo.