Ngo-ngaku re de’oso re ḏegoro
14 'Ari ioronongoḏu ngo-ngaku rimoi, ma 'utungu 'oru na’o unanga 'o kanau, "Ngoi to ngaku Yesus Kristus ḏua," mada’a 'a sijumu ua 'ai ngo-ngaku gena-ge tai de’oso re ḏegoro? Sanga ua, ngo-ngaku so’o gena-ge nyengara sisalamata unanga! 15 Si’ade-'ade i’a matengo tananga sigolona, na-nau’u bolo we-were’a, 'aḏi paralu pakeanga re manga ngo-ngoromo wange moi-wange moi 'i ngadolo ua, 16 mada’a ngini pa’i ni kanau toma ngowa’a gena-ge, "Ma Jou’ongu Madutu 'age ra ngana, ngoi to nganono ngana ḏuanga i’a no basono 'alo ua re 'ani ngo-ngoromo wange moi-wange moi 'i ngadolo." Ma 'utungu 'oru ra ninga ioronongoḏu ngo-ngaku rimoi gena-ge na’o ngini ni kanau pa’i so’o gena-ge, mada’a ni pula’a 'oru rimoi mai ua! 17 So’o gena-ge ḏi’i reo ngo-ngaku! Na’o na sijumu ua ninga ngo-ngaku taninga de’oso re ḏegoro, ngo-ngaku gena-ge ma faeda 'i cua.
18 Ḏa ngowa’a matengo i’a 'o kanau, " 'Age ngowa’a 'aḏi masidiriwa pa’i tamanga ngo-ngaku ḇato, ngowa’a lelegu 'aḏi masidiriwa pa’i tamanga ga’a ḇato." Ngoi ta sangoro, "Sijumu ino ra ngoi, ma duhu sa’olo ngowa’a remanga ngo-ngaku mada’a manga ga’a 'i mete’e manga ngo-ngaku ua. Re ngoi ḏuanga i’a ta sijumu 'ari ga’a ra ngini ga’a 'i mete’e 'ari ngo-ngaku." 19 Ngini ni ngaku mangale Ma Jou’ongu Madutu pa’i matengo ḇato. Ya tero mode’e, mada’a roh-roh ma jira mai ngaku ma tero ḏi’i re enanga 'i mojongo singadolo 'i terewete! 20 Ngini haga madutu! Ngini ni paralu bukiti 'oru mangale ma faeda 'i cua, na’o ninga ga’a 'i mete’e ua ninga ngo-ngaku? 21 Oḏi’i ḇato 'a Abraham, nanga ete re dotumu. Unanga Ma Jou’ongu Madutu 'u dawongo sa’olo ngowa’a loasa re banari wakutu unanga 'a sipula’a 'ai ngowa’a nau’u 'a Isak di’a 'ai jou-jou ra Ma Jou’ongu Madutu toma jou-jou ma ngi’i ma re’u.2:21 Do. 22:1-14 22 Gena-ge 'i sitarangi mangale 'ai ngo-ngaku 'i waiti tai ga’a singadolo 'ai ngo-ngaku 'i dadi ti-tiai. 23 Gena-ge 'i ma tero sa’olo 'i silefo toma Boku 'Ofi-'Ofi, "Abraham 'o ngaku Ma Jou’ongu Madutu. Re sababu 'ai ngo-ngaku gena-ge, Ma Jou’ongu Madutu 'u dawongo unanga sa’olo ngowa’a loasa re banari Tai momina." Sababu gena-ge, Abraham si’aro’o, "Ma Jou’ongu Madutu 'ai ḏagilomu".2:23 Do. 15:6; 2Taw. 20:7; Yes. 41:8 24 Gena-ge 'i tarangi ḏua ra ngene mangale Ma Jou’ongu Madutu 'o dawongo ngowa’a sa’olo ngowa’a loasa re banari, sababu manga ga’a la-la re pa’i manga ngo-ngaku ḇato ua.
25 Oḏi’i ḏi’i ngo Rahab, we-were’a su-sudala ga’a mo tegoro toma limau Yeriko. Ma Jou’ongu Madutu 'o dawongo munanga sa’olo ngowa’a loasa re banari, sababu 'ami ga’a la-la. Munanga mo dawongo ngowa’a tamo-tamolo re munanga mo gogono ananga tami wala re mo sijumu manga ngo’omo lelegu di’a 'aḏi maḏibo.2:25 Yos. 2:1-21 26 Na, ma tero sa’olo nanga lese kama ngagara ua, lese gena-ge ri sengene. So’o gena ḏi’i, ngo-ngaku kama ga’a la-la ua, ngo-ngaku gena-ge ri sengene ḏi’i re ma faeda 'i cua.