1 Na’u si’elingi tau-taunu ngowa’a ngaku Yesus tani jama’ata-jama’ata mangale ananga balasu 'aḏi 'isene manga nagara ma sae’e re manga bi-biri’i--bi-biri’i. Ananga balasu ya mete’e manga bi-biri’i re manga nagara ma sae’e manga pamarenta re manga 'akala re sinyingara 'i ḏu-ḏuanga ḏua di’a 'a’a 'ori i’a ma la-la. 2 Kanau i’a ra ananga: jajaha demo awa, re ni ma’u tolabe awa ra guna ḇato. Mada’a siḏibo ḏi’i, tamanga de’oso re ḏegoro ma dara balasu pake 'akala ḇanyo re 'aḏi maholo tala ninga diri mode-mode’e sidodai ra guna ḇato. 3 Sababu 'au nga’ene, ngene masiretene wo haga, mete’e ua Ma Jou’ongu Madutu re ngowa’a na sihaga. Ngene wo dadi budaka toma dungia ma nyafusu ma jira mo-moini, singadolo tananga 'ahu ma dara 'i romanga re 'i baolo 'ori i’a ma jira, 'akala go-goḏi re ngene ma’u emono matengo re matengo. 4 Mada’a Ma Jou’ongu Madutu, nanga Salamata ma Cimi, 'a sijumu 'Ai dadalara re 'Ai la-la ra ngene, 5,6 Unanga na sisalamata ngene. I’a sa’olo? Sababu ngene wo madaga’a 'ori i’a ma la-la?! So’o gena-ge ua! Mada’a pa’i sababu Unanga masiretene 'o sijumu 'Ai 'akala re sinyingara ma la-la ḇato ra ngene. Sababu Yesus Kristus 'ai se-sengene, Unanga gena-ge ga’a nanga Salamata ma Cimi, Ma Jou’ongu Madutu 'O sisalamata ngene re 'O pula’a pai-pai’i Ma Ngagara 'Ofi-'Ofi ra ngene. Dadi ngene sibuoro su-sungi, re Ma Ngagara 'Ofi-'Ofi ri si’ofi ngene tananga ḏosa re ri pula’a 'ahu su-sungi ra ngene. 7 Ma Jou’ongu Madutu 'o 'a’a so’o gena-ge, la ngene nga’unu wo dadi ngowa’a kamanga sala ua Tai momina, sababu Yesus 'ai mura re dadalara. Re ḏi’i ngene nga’unu wo sanga 'ahu kasingado-ngadolo i’a ga’a ngene wo ngano-nganono. 8 Do-doto’o gena-ge 'i tero mode’e.

Sababu gena-ge, ngoi to mau ngana na sitarangi do-doto’o gena-ge tau-taunu rani ngo-ngaku mode-mode’e, la ngowa’a ga’a raḏi ngaku Ma Jou’ongu Madutu ananga 'aḏi makutale mode-mode’e ya si’a’a tau-taunu munara la-la. Do-doto’o gena-ge rema faeda re la-la di’a ngowa’a mo-moini. 9 Mada’a awa ni ma’u rubutu 'ori i’a ma faeda 'i cua, re awa ni ma’u rubutu mangale ninga 'asala, awa ni ma’u tolabe re ni ma’u go’oro mangale ninga 'agama ma 'atoranga, sababu mo-moini gena-ge ma 'utungu bolo ma faeda 'i cua. 10 Ngowa’a ga’a 'aḏi 'a’a kaco toma jama’ata ma dara, ngana balasu na’u ḇangata soi moi bolo soi ḏiḏi. Na’o ananga 'aḏi matogumu ua, awa ngana no supu-osama ra ananga moju. 11 Sababu ngana na waro mode-mode’e ngowa’a manga duhu so’o gena, ananga raḏi iranga ngo’omo re 'aḏi 'a’a ḏosa tau-taunu, sababu 'i dadi biasa ḏua. Sababu gena-ge 'i dadi bukiti rimoi ananga gena-ge ngowa’a baraḏosa.

12 Pasala i’a, ngoi jau-jau to 'utusu 'a Artemas bolo 'a Tikhikus ra ngana, no sapolo caiti ma’u sanga ra ngoi toma limau Nikopolis, sababu ngoi 'ari maksudu to tegoro da’a ma di’ara mete’e 'orasa 'alo-'alo ma ngara.✝3:12 Som. 20:4; Ef. 6:21-22; Kol. 4:7-8; 2Tim. 4:12 13 Titus, ngana no makutale mode-mode’e no riono 'a Zenas, 'o hukumu ma gu-gu’u, re 'a Apolos ḏi’i tamanga ḏo-ḏagi ma dara; ngana nga’unu no sioḏi’i ananga.✝3:13 Som. 18:24; 1Kor. 16:12 14 Ngowa-ngowa’a ngaku Yesus, ngene balasu madoto’o 'a’a 'ori i’a ma la-la tau-taunu di’a siriono ngowa’a mete’e manga 'ahu ma paralu, la nanga 'ahu 'i parasaja awa.

15 Ngomi mo-moini 'ane mi siḏingoto minga tabea ra ngana, na singadolo minga tabea tananga ḏagilomu-ḏagilomu ga’a 'aḏi dadalara ngomi re manga ngo-ngaku 'i ma tero ra ngene. Ngoi to golo’o Ma Jou’ongu Madutu mangale 'Ai mura re dadalara sieanga i’a ua ngini mo-moini.