Takpum inkhata abâkngei tamtak
12 Khrista hih takpum inkhat angin ania, abâkngei tamtak a dôna, abâkngei tamtaka sin nikhomsenla maha takpum inkhat dên ani.12:12: Rom 12:4-5 13 Ma angdên han, ei rêngin Judangei mo, Jentailngei mo, suokngei mo, suokngei niloi mo takpum inkhata om rangin Ratha inkhat dên han baptis ei nia, male ei rêngin Ratha inkhatin buong rangin pêkin ei om zoi ani.
14 Takpum hih abâk inkhat vai niloiin, abâkngei tamtak ani. 15 Kepha hin, "Kut ki niloi sikin takpuma kop mu-ung," ti ta senla masika han takpuma koploi ni uol no nih. 16 Kuor hin, "Mit ki niloi sikin takpuma kop ni mu-ung," ti ta senla masika han takpuma koploi ni uol no nih. 17 Takpumpui hih mit nizit ta senla kho angin mo a rangâi thei rang? Kuor nizit ta senla inmo amirim a riet rang? 18 Ma anghan, nikhomrese, Pathien’n takpuma hin a nuomnana muna a abâk a mokhop ani. 19 Anrêngin abâk khat ni ta senla, takpum khom om no ni! 20 Ma anghan abâkngei tamtak nikhom senla takpum chu inkhat kêng ani.
21 Masika han mitngei hin kutngei kôm, "Nangni nâng mak me!" ti thei mak ngei. Lu khomin kephangei kôm "Nangni min nâng mu-ung!" ti thei uol mak. 22 Ani, hima nêkin, takpum abâk râtloi anga ânlang ngei hih kam an nâng uol tatak ania; 23 male takpuma ei minlut ok ngâiloi abâkngei hih ei minlut tak ani ngâia; ei takpum abâk enhoi bâkloi ngei hin enhoina lien uol an man ngâi, 24 ei takpum abâk enhoi uol ngeiin chu ma anga tho rang hah nâng mak. Pathien lelên enhoina dônloi abâkngei hah minlut uolin takpum hih aminpholom ani. 25 Masikin takpuma hin insenna om maka; abâkngei murdi hin inangsarrin an mindon inlôm ngâi ani. 26 Ma anghan abâk inkhatin atuongin chu abâk dangngei khom an tuongpui sa ngâi; abâk inkhatin minpâkin aomin chu abâk dangngei murdi’n an râiasân pui ngâi.
27 Nin rêngin Khrista takpum nin nia, male nin sika abâk inkhat chit nin ni.
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)