LUKE 8

Jairus nâinupang le nupang hulloi a mindam

40 Hanchu, Jisua dîl râl tieng a hongtung nôkin chu, mipuingei ama lei ngak sikin an lei modôma. 41 Ha khuoa synagog ruoipu Jairus a honga, Jisua ke bula ânboka, a ina se rangin a ngêna. 42 A nâikhât nâinupang, kum sômleinik mi, a thi vavâng sikin. Hanchu, Jisua a sên chu mipuingeiin an ûmhura.

43 Nupang inkhat kum sômleinik piel, hulloi inrik a oma, ai dôn murdi doctora a thâm let zoia,*8:43: Miziek senkhat ngei chu ai dôn murdi doctora atham let zoi ti hih dôn mak ngei tute lakin mindam thei mak ngeia. 44 Mipuingei kâra Jisua nûktieng a honga, a puonmor a tôna, harenghan a dam kelena. 45 Jisua’n, "Tumo ni tôn?" a tia. Kei chu ni mu-ung an ti chita. Hanchu Peter’n a kôma, "Minchupu, hi dôra mipuiin nang an uop hite" a tipea. 46 Ania, Jisua’n "tuminin chu min tôn, Keima renga sinthotheina ajôk" a tia. 47 Nupangnu ani ti rietsuok ani zoi, ti ânriet tena chu, innîk pumin mipuingei makunga, Jisua ke bula inbokin, a tôna harenghan a dam kelen roi hah misîr zoi. 48 Hanchu, Jisua’n a kôma, "Ka nâinupang, na taksônnân nang a mindam zoi, rathanngam takin se ta roh" a tipea.

49 Jisua’n ha a ti lâitakin, ruoipu in renga thangthei a honga, Jairus kôma, "Na nâinupang a thi zoi, Minchupu jêl khâi no roh" a tia. 50 Jisua’n a rieta, Jairus kôma, "Chino roh, iem ngit roh, dam a tih," a tipea. 51 In ava tungin chu Peter, John, Jacob, nâite nû le pa pêna chu tute dang a kôma lût phal maka. 52 Hataka om murdi nâite chûlin an chapa, Jisua’n, "Chap no roi, athi ni mak, a in kêng" a tia. 53 Hanchu, nâite hah a thi ani iti an riet sikin an munuisana. 54 Hanchu, Jisua’n a kut a sûra, "Ka nâite, hong inthoi roh" a tia. 55 Hanchu, a ringna a juong kîra, harenghan a hon thoia, Jisua’n "sâk rang imokhat pêk roi" a tia. 56 A nû le a pa’n kamâm om an ti tataka; nikhomrese, Jisua’n chu a sintho hah tute ril loi rangin chong a pêka zoi.