21 Male Peter hah Jisua kôm a honga, "Pumapa ka lâibungpa’n ku chunga sietna sin bang senla, voizet mo ka ngâidam rang? Voi sari mo?"✝ tiin a rekela.

22 Jisua’n a kôm, "Nimak, voi sari ni loiin, voi sômsari mun sari tena,"*✝ tiin a thuona, 23 "Invân Rêngram chu, voikhat chu rêngpa inkhatin a tîrlâmngei kôm an sum thurchi enmindik ranga masatpu angin ani sikin. 24 A hong enmindik phutin chu mi inkhat talent isângsôm intâng a kôm an hong tuonga. 25 Ma tîrlâm han a lakâi pêk rang ahundôr a dônloi sikin rêngpa han ama, a lômnu, a nâingei leh a dôn murdi juorin, a lakâi thuon rangin chong a pêka. 26 Tîrlâm han rêngpa makunga khûkinbilin ânboka. ‘Ka chunga nu phûkminsei viet inla, anrêngin nang thuon let ki tih!’ tiin ânvûia. 27 Rêngpa han inrieng a mua, hanchu a lakâi hah a ngâidam phara, a min se zoi.

28 "Hanchu ha mi hah a jôkpaia, a tîrlâm champui ngei lâia inkhat duli razakhat intâng ava mua. Ava sûrrapa, a ringôn a sôm pea, Na lakâi hah ni thuon ta roh!" a tia. 29 A tîrlâm champui hah ânbôka, "Ku chunga nu phûkminsei viet inla, nang thuon ki tih!" tiin ânvuia. 30 Hannirese nuom maka; manêkin a lakâi a thuon mâka chu intâng ina a khum zoi. 31 Tîrlâm dang ngeiin a sintho lam hah an mûn chu an mulunghoi maka, rêngpa kôm an sea, neinun nâm an va misîr pea. 32 Masikin rêngpa han tîrlâm hah a koia, a kôm, Nangma tîrlâm kâmnângloi! nên vûi sikin na lakâi murdi nang ka ngâidam ani. 33 Keiman nu chunga moroina ko dôn anghan, nang khomin ni tîrlâm champui chunga moroina no dôn rang kêng ani, a tipea. 34 Rêngpa hah atakasi sabaka, male ha tîrlâm hah a lakâi a thuon suo mâka rangin intâng ina a khum zoi.

35 Jisua’n, "Ma angdênin mitinin nin lâibungngei nin mulungrîl tatak renga nin ngâidam nônchu invâna ka Pa khomin nin chunga ma angdênin thông a tih," tiin chongkhârnân a ti ani.