Mateus 2

Nisuotieng renga mivârngei

1 Rêng Herod ânlal lâihan Judea rama Bethlehem khopuia Jisua ajuong inzira. Ânzirsuo, harenghan, ârsi tienga lekha inchû ngâi mivârngei senkhat nisuotieng renga Jerusalema an juonga 2 "Khotieng mo Judangei rêng ajuong inzir nâitesen hah a om? Nisuo tienga ama ârsi kin mua, ama chubaimûk rangin kin juong ani," an tia.

3 Ma roi hah Rêng Herod’n a rietin chu, a mulungjîng sabaka, Jerusalema mi murdi khom an mulung ajîng sa ani. 4 Ochaisingei le Balam minchupungei murdi munkhatin a koibûm ngeia, an kôm han, "Khotieng mo Messiah ânzir rang?" tiin a rekel ngeia.

5 Hanchu, anni han a kôm, "Judea ram Bethlehem khopuia," tiin an thuona, Dêipu’n hi anghin a lei mizieka:

6 "Judah ram sûnga Bethlehem,✝2:6: Mic 5:2

nangma Judah khopuilienngei lâia achîntak ni tet mak che;

na sûng renga ruoipu alân zir rang ani,

ki mi Israelngei ruoi rangpu hah."

7 Masikin Herod’n nisuo tienga mivârngei hah a koi ngeia, ârsi ânlang zora tak hah anni renga a man theina rangin inrûktên ântongpui ngei zoi. 8 Hanchu hi chong hih bê’n anni hah Bethlehem’a a tîr ngei: "Se ungla, nâite hah asadimin va rok ungla, nin mûn chu mi hong ril nôk roi, masikin keima khom ama chubaimûk ke se theina rangin," a tia.

9,10 Hanchu an mâka, male an lampuia an sea, nisuo tienga ârsi dên hah an mu nôka. Ârsi hah an mûn chu an râiasân sabaka, idôr taka râisân mo an ni zoi! Nâite omna chung ridîn aphâk mâka chu inngam loiin an moton a ruoi ngei banga. 11 Insûnga an va lûta, male a nu Mary leh nâite hah an va mua, khûkinbilin chubai an mûk zoi. Neinunpêk ranga an chôi, rângkachak, bero le myrrh (murrah) an kaisuoa, a kôm an pêk zoi.

12 Hanchu, Herod kôm tieng se nôk khâiloi rangin an ramangin Pathien’n inningna a pêk ngei sikin lampui danga an ram tieng an kîrnôk zoi.