1 හේ මම භ්‍රාතරඃ, යූයම් අස්මාකං තේජස්විනඃ ප්‍රභෝ ර‍්‍යීශුඛ්‍රීෂ්ටස්‍ය ධර්ම්මං මුඛාපේක්‍ෂයා න ධාරයත|

2 යතෝ යුෂ්මාකං සභායාං ස්වර්ණාඞ්ගුරීයකයුක්තේ භ්‍රාජිෂ්ණුපරිච්ඡදේ පුරුෂේ ප්‍රවිෂ්ටේ මලිනවස්ත්‍රේ කස්මිංශ්චිද් දරිද්‍රේ(අ)පි ප්‍රවිෂ්ටේ

3 යූයං යදි තං භ්‍රාජිෂ්ණුපරිච්ඡදවසානං ජනං නිරීක්‍ෂ්‍ය වදේත භවාන් අත්‍රෝත්තමස්ථාන උපවිශත්විති කිඤ්ච තං දරිද්‍රං යදි වදේත ත්වම් අමුස්මින් ස්ථානේ තිෂ්ඨ යද්වාත්‍ර මම පාදපීඨ උපවිශේති,

4 තර්හි මනඃසු විශේෂ්‍ය යූයං කිං කුතර්කෛඃ කුවිචාරකා න භවථ?

5 හේ මම ප්‍රියභ්‍රාතරඃ, ශෘණුත, සංසාරේ යේ දරිද්‍රාස්තාන් ඊශ්වරෝ විශ්වාසේන ධනිනඃ ස්වප්‍රේමකාරිභ්‍යශ්ච ප්‍රතිශ්‍රුතස්‍ය රාජ්‍යස්‍යාධිකාරිණඃ කර්ත්තුං කිං න වරීතවාන්? කින්තු දරිද්‍රෝ යුෂ්මාභිරවඥායතේ|

6 ධනවන්ත ඒව කිං යුෂ්මාන් නෝපද්‍රවන්ති බලාච්ච විචාරාසනානාං සමීපං න නයන්ති?

7 යුෂ්මදුපරි පරිකීර්ත්තිතං පරමං නාම කිං තෛරේව න නින්ද්‍යතේ?

8 කිඤ්ච ත්වං ස්වසමීපවාසිනි ස්වාත්මවත් ප්‍රීයස්ව, ඒතච්ඡාස්ත්‍රීයවචනානුසාරතෝ යදි යූයං රාජකීයව්‍යවස්ථාං පාලයථ තර්හි භද්‍රං කුරුථ|

9 යදි ච මුඛාපේක්‍ෂාං කුරුථ තර්හි පාපම් ආචරථ ව්‍යවස්ථයා චාඥාලඞ්ඝින ඉව දූෂ්‍යධ්වේ|

10 යතෝ යඃ කශ්චිත් කෘත්ස්නාං ව්‍යවස්ථාං පාලයති ස යද්‍යේකස්මින් විධෞ ස්ඛලති තර්හි සර්ව්වේෂාම් අපරාධී භවති|

11 යතෝ හේතෝස්ත්වං පරදාරාන් මා ගච්ඡේති යඃ කථිතවාන් ස ඒව නරහත්‍යාං මා කුර‍්‍ය්‍යා ඉත්‍යපි කථිතවාන් තස්මාත් ත්වං පරදාරාන් න ගත්වා යදි නරහත්‍යාං කරෝෂි තර්හි ව්‍යවස්ථාලඞ්ඝී භවසි|

12 මුක්තේ ර්ව්‍යවස්ථාතෝ යේෂාං විචාරේණ භවිතව්‍යං තාදෘශා ලෝකා ඉව යූයං කථාං කථයත කර්ම්ම කුරුත ච|

13 යෝ දයාං නාචරති තස්‍ය විචාරෝ නිර්ද්දයේන කාරිෂ්‍යතේ, කින්තු දයා විචාරම් අභිභවිෂ්‍යති|

14 හේ මම භ්‍රාතරඃ, මම ප්‍රත්‍යයෝ(අ)ස්තීති යඃ කථයති තස්‍ය කර්ම්මාණි යදි න විද්‍යන්ත තර්හි තේන කිං ඵලං? තේන ප්‍රත්‍යයේන කිං තස්‍ය පරිත්‍රාණං භවිතුං ශක්නෝති?

15 කේෂුචිද් භ්‍රාතෘෂු භගිනීෂු වා වසනහීනේෂු ප්‍රාත්‍යහිකාහාරහීනේෂු ච සත්සු යුෂ්මාකං කෝ(අ)පි තේභ්‍යඃ ශරීරාර්ථං ප්‍රයෝජනීයානි ද්‍රව්‍යාණි න දත්වා යදි තාන් වදේත්,

16 යූයං සකුශලං ගත්වෝෂ්ණගාත්‍රා භවත තෘප්‍යත චේති තර්හ්‍යේතේන කිං ඵලං?

17 තද්වත් ප්‍රත්‍යයෝ යදි කර්ම්මභි ර‍්‍යුක්තෝ න භවේත් තර්හ්‍යේකාකිත්වාත් මෘත ඒවාස්තේ|

18 කිඤ්ච කශ්චිද් ඉදං වදිෂ්‍යති තව ප්‍රත්‍යයෝ විද්‍යතේ මම ච කර්ම්මාණි විද්‍යන්තේ, ත්වං කර්ම්මහීනං ස්වප්‍රත්‍යයං මාං දර්ශය තර්හ්‍යහමපි මත්කර්ම්මභ්‍යඃ ස්වප්‍රත්‍යයං ත්වාං දර්ශයිෂ්‍යාමි|

19 ඒක ඊශ්වරෝ (අ)ස්තීති ත්වං ප්‍රත්‍යේෂි| භද්‍රං කරෝෂි| භූතා අපි තත් ප්‍රතියන්ති කම්පන්තේ ච|

20 කින්තු හේ නිර්බ්බෝධමානව, කර්ම්මහීනඃ ප්‍රත්‍යයෝ මෘත ඒවාස්ත්‍යේතද් අවගන්තුං කිම් ඉච්ඡසි?

21 අස්මාකං පූර්ව්වපුරුෂෝ ය ඉබ්‍රාහීම් ස්වපුත්‍රම් ඉස්හාකං යඥවේද්‍යාම් උත්සෘෂ්ටවාන් ස කිං කර්ම්මභ්‍යෝ න සපුණ්‍යීකෘතඃ?

22 ප්‍රත්‍යයේ තස්‍ය කර්ම්මණාං සහකාරිණි ජාතේ කර්ම්මභිඃ ප්‍රත්‍යයඃ සිද්ධෝ (අ)භවත් තත් කිං පශ්‍යසි?

23 ඉත්ථඤ්චේදං ශාස්ත්‍රීයවචනං සඵලම් අභවත්, ඉබ්‍රාහීම් පරමේශ්වරේ විශ්වසිතවාන් තච්ච තස්‍ය පුණ්‍යායාගණ්‍යත ස චේශ්වරස්‍ය මිත්‍ර ඉති නාම ලබ්ධවාන්|

24 පශ්‍යත මානවඃ කර්ම්මභ්‍යඃ සපුණ්‍යීක්‍රියතේ න චෛකාකිනා ප්‍රත්‍යයේන|

25 තද්වද් යා රාහබ්නාමිකා වාරාඞ්ගනා චාරාන් අනුගෘහ්‍යාපරේණ මාර්ගේණ විසසර්ජ සාපි කිං කර්ම්මභ්‍යෝ න සපුණ්‍යීකෘතා?

26 අතඒවාත්මහීනෝ දේහෝ යථා මෘතෝ(අ)ස්ති තථෛව කර්ම්මහීනඃ ප්‍රත්‍යයෝ(අ)පි මෘතෝ(අ)ස්ති|