1 Korintuna 12

Ligilisi lúgubu Kristu

12 Gíbeti umegeguni lidan wágubu, gama lumoun sun umegeguni ligía ábanrügüñein úgubu ladüga. Ítara liña giñe le unbei wagúara lúgubu Kristu. 13 Sun wagía lau ábanmeme Sífiri wabadiseirúa —huríu, mama huríu, idamuni, mama idamuni, —sun wagía, resibi wamuti ábanmeme Sífiri ligía.

14 Mámarügüñein aban umegegu luagu wágubu, gíbeti umegeguni luagu. 15 Anhein hamuga ariñaga ugudi: «Mama au líbiri úgubu lugundun mama nan úhabu», mama luéigiñe lira lun mámabei lan líbiri úgubu; 16 anhein lan hamuga ariñaga arigei: «Mama au líbiri úgubu lugundun mama nan aguu», mama luéigiñe lira lun mámabei lan líbiri úgubu. 17 Lun hamuga aguu lan sun úgubu, ida liña hamugagia waganbun? O lun hamuga arigeirugu lan sun úgubu, ida liña hamugagia wirimichun? 18 Ru laali Bungiu kada lumegegun úgubu le ñein lumuti labusenra. 19 Lun hamuga ábanrügüñein lan umegeni luagu úgubu, móustarunti hamuga úgubu. 20 Lau sun gibe lan lumegegun úgubu, ábanrügüñein úgubu.

21 Siñati lariñagun aguu lun úhabu: «Memegeirun numutibu»; siñati giñe lariñagun ichügü lun ugudi: «Memegeirun numutibu». 22 Lubaragiñe lira, le burí lumegegun úgubu le arihubei kamá débiliti, ligíatima burí mégeiwabei; 23 le burí lumegegun úgubu le wanügübei kei ni kata, ligíatima wadaüraguagüdübei lau saragu góunigi. Le buriti líbiri lumegegun wágubu le maríawasebei, ligíatima wadouragubei lau duari, 24 anhein buriti líbiri lumegegun wágubu le garíawasebei, memegeirunti wóunigiruni ítara. Ítara liña laranseruni Bungiu úgubu lun le lan burí líbiri umegeguni le anügǘbei kei ni kata, ligíatima lan wéirigu, 25 lun anihein lan aban úarani luagu úgubu lidan le luadigimaridun sun umegeguni lidan aban, lau aban góunigi hóuniwagua. 26 Anhein asufurira aban lídangiñe lumegegun úgubu, súfuriti giñe burí le líbiri; anhein giñe ouserúa aban lídangiñe buidu, aba lagundaarun le burí líbiri luma.

27 Ítarameme liña giñe, lúgubu Kristu huguya; ani kada aban hídangiñe, lumegegun úgubu ligía.