Marcos 11

Yesu lengilinga mu Yelusalemu

1 Mpobalashika ku Yelusalemu pepi ne minshi ya Betifagi ne Betani mumbali mwa mulundu wa Maolifi, Yesu walatuma beshikwiya babili. 2 Ne kubambileti, "Kamuyani mu mushi ngomulabononga usa, mwengila nimucane mwanambongolo wasungwa, utana utantwapo ne muntu, mumusungulule mumulete kuno. 3 Na muntu naumbi amwipusheti ingamula mutwalanga kupeyo, mumwambileti Mwami layandanga kumusebensesha, apwisha na mulete kayi."

4 Neco mpobalaya balacana mwanambongolo, kaliwasungililwa pa cishinga pepi ne nshila, nabo balamusungulula. 5 Bantu balikuba pepi balepusheti, "Inga mulamusungululwinga cani?"

6 Nabo balakumbula mbuli Yesu ncalabambila. Neco balabasuminisha beshikwiya. 7 Nabo balamuleta mwanambongolo kuli Yesu, ne kubika cikwisa pa musana pa mwanambongolo kwambeti aikalepo Yesu. 8 Bantu bangi balayansa bikwisa byabo panshila, nabambi balatimbula misampi yatutondo twamulibala. 9 Bantu bonse balikuba pantangu ne abo balikuba kunyuma balatatika kubilikisheti,

"Lesa alumbaishiwe! Lesa ape colwe uyo lesanga mulina lya Mwami.

10 Lesa ape colwe Bwami

bulesanga bwa Dafeti mushali wetu.

Lesa wa Kwilu kumayoba alumbaishiwe!"

11 Yesu mpwalashika mu Yelusalemu, walengila mu Ng’anda ya Lesa, ne kulanga langa byonse. Pakwinga calikuba kendi cindi ca mansailo, walapula ne kuya ku Betani pamo ne beshikwiya likumi ne babili.