João 13

Tujiladene Kon Waghazho

1 Jiulidaosan Jieni melieshida Ersa duyase likai giezhi Adane hhende echiku shihou kurukui mejiewo. Hhe ene duyani goya kunladene orezhi zuihou kurutula izhi orezho. 2 Heifan ijiekude Ibilisi Jialie kun Ximunyi kewon Yudai zhughede Ersai ghudandukui melieshise gie goudaghazho. 3 Ersa Adani duyani qienlii hhei khade jiuisanyi, goyaneshi Hudai hhense iresanyi, pse Hudai hhende echikui mejiene. 4 Ingie Ersa shire konse bosi ire jienne tei, kanzidene nie shoujinyi banla, 5 nie nienpen usui kiezhi ire, tujilane konyi waghasenu kanzidene banlasan shoujinghala caizhi ghoghawo. 6 Waghazhi Ximun-Bedurude kuzhese Beduru Ersade kieliewo, "Ezhan, chi mini konni waghanu?" 7 Ersa kieliewo, "Bi giesanyi ede chi ulie mejienema, khuinashi mejiene." 8 Beduru kieliewo, "Chi mini konni jiedui waghazhi ulie olune." Ersa kieliewo, "Bi chii ulie waghase bi jienliesan guzide chi bei dane." 9 Ximun-Beduru kieliewo, "Ezhan, qinse gon konyimi bu wagha. Kha, qiorunyimi man wagha." 10 Ersa kieliewo, "Xizao giezhi daosan kun zinie konne waghase hunshenni man ganjin wo. Tashi ganjinni woma, manshi ganjinni pusho." 11 Ersa kien hhei ghudandukui melieshise mejiene. Ingiese "Tashi man ganjinni pusho." giezhi kieliewo. 12 Ersa hhelai konni waghazhi balu, jienne musidene pse souwo. Ingie hhelade kieliewo, "Bi tande giesanyi ta dunjirewoye? 13 Ta mini loushi, ezhan giezhi uruzho. Ta urusan oluzho. Bi enbene. 14 Bishi tai ezhan, loushi woma, tai konni waghawo. Taye nieniene konyi wagha. 15 Bi tande nie yanzi uzheghawo. Ta ye zhao bi tande giesan mutun giendu. 16 Bi tande shuhuajia kielieye, hoji ezhanse fugie uwo. Peizhi ireghasan kun peisan kunse fugie uwo. 17 Enei ta mejienema, ta ingiezhi giese tande fuqi wine.